2506/2024-2025

2024 Khuangchawi thla ni 12: Vawiin khan Lunglei North bialtu MLA, Lunglei High Powered Committee (HPC) Vice Chairman Pu V. Malsawmtluanga chuan a bial chhung khaw hrang hrang fangin, kut hna thawktute tan silpaulin a sem bakah, amah dawr duhte tan inkawmna hun (public interview) a buatsaih a. Bial chhunga hmasawnna hna thawh ṭhenkhat a endik bawk.

Pu V. Malsawmtluanga chuan thingtlang mi kut hna thawktu leh a mamawh apiangte tan silpaulin sem runpui chu buatsaih a nih thu sawiin, a bial chhung khaw 21-ah kumin buh seng hma ngeia sem chhuak vek turin hma lak mek a ni tih a sawi a. Mipuite chu sawrkarin "Bana Kaih" ruahmanna (handholding policy) an ban phaka a chhawp chhuah chu thlir liam mai lo va, chhawr ṭangkai tum ṭheuh turin a chah a ni.

Vawiina Lunglei North bialtu MLA Pu V. Malsawmtluanga'n a bial chhunga silpaulin a sem chhuah zawng zawng hi 2,000 a ni a. Silpaulin a sem bakah hian PHC Haulawng chu tlawhin, Cyclone Remal-in a tihchhiat HPC fund hmanga thawm ṭhat hna thawh mek chu a endik a. A lo tiam tawh angin he damdawi ina X-ray khawl dah tur hian hma a lak zel thu sawiin, a building sakna tur hmun pawh a en nghal bawk.