3664/2022-2023

Lunglei the 23rd February, 2023: Vawiin khan Lunglei Sanitation Task Force chu an Chairman Pi Ramdinliani, Deputy Commissioner kahhruaiin Lunglei DC Conference Hall-ah an thukhawm. UD&PA Department buatsaih ‘Mizoram Khawpui Fai Inelna’ thlirletna leh kumin neih leh tur atana Lunglei District inpuahchah dan tur te, India pum huap fai inelna Swachh Survekshan 2023 inpuahchah dan tur te, Veng chhung thenfai kawnga khua leh tui hnathawk tha te – Local Swachhata Heroes thlan chhuah dan tur rel a ni.

Lunglei Sanitation Task Force Committee-ah hian Member Secretary Lunglei DUDO Pi Vanthangpuii leh a thawhpuite bakah department hrang hrang official-te leh Lunglei town area VC-te, MJA, YMA leh tlawmngai pawl dang aiawhte an tel a ni.

Meeting kaihruaitu Lunglei Sanitation Task Force Chairman Pi Ramdinliani chuan Lunglei khawpui chu fai a tih thu sawiin Mizoram Khawpui Fai Inelnaah kum 2017 atangin kum tin a ti tha berte zing ami kan ni thin chu a lawmawm takzet a ni, a ti a. He dinhmun thleng thei tura rim taka thawka hun leh tha nasa tak seng tute Nodal Department UD&PA, khawtlang hruaitute, tlawmngai pawl hrang hrangte chungah lawmthu a sawi a. Lunglei Sanitation Task Force Committee chu khawpui faina leh thianghlimna ah thuneihna sang tak nei a nih thu tarlangin Lunglei District-in faina kawnga hma a sawn zel theihnan Task Force member-te chu theihtawp chhuah theuh turin a chah a. Department-te pawh District faina hmasawnna tura inpawhtlang taka thawk tura chahin a theih anga hmalak ho (scheme convergence) kalpui turin a chah a ni.

Member secretary DUDO Lunglei Pi Vanthangpuii chuan report pe in faina kawnga kum 2022 a Lunglei in lawmman a dawn hrang hrang hengte - Mizoram Khawpui Fai Inelna 2022 – 2nd Rank in District Headquarter Category; Swachh Survekshan 2022 – Best City in NorthEast Zone; Indian Swachhata League – Best Team Lunglei Legions te a tarlang a ni. Compost pit siam chungchangah awareness kalpui mek niin mahni ramah remchan dan anga kalpui bakah sangha bawm ah te siam a nih thu tarlang bawk.

Kum danga lo tih thin tawh angin Category hrang hrang hnuaiah Lunglei khawpui chhungah intihsiakna kuminah pawh buatsaih leh ngei ni se tih meeting chuan a rel a. Intihsiakna lawmman hi Faina Hapta 2023 chhunga sem chhuah hman ngei turin ruahmanna neih ni se tih meeting chuan a rel bawk a. Veng chhung thenfai kawnga khua leh tui hnathawk tha te – Local Swachhata Heroes-te chawimawi chungchang pawh sawiho niin VC tin ten an area chhung ami theuh hming thehlut se tih an rel bawk.