1772/2026-2027

Lunglei, 2026 Thlazing ni 13: Vawiin khan kumin fur ruah surin Lunglei District chhung hmun hrang hranga lei min a thlen avanga harsatna tawk khawtlang leh chhungkuate tana Lunglei District Disaster Management Authority (DDMA) kal tlanga ṭanpuina leh chhawmdawlna ruahmante chu Lunglei South bialtu MLA Pu Lalramliana Papuia hovin a dawngtute kutah hlan a ni.

He hunah hian Lunglei DDMA-in DonateKart Foundation aṭanga chhiatna laka invenna leh chhanchhuah hna thawhna hmanraw chi hrang hrang – Safety Kit (raincoat, gumboot leh first aid kit) a dawnte chu Theiriat, Bualte, Ṭawipui South leh Dawn khuaa Village Disaster Management Committee (VDMC) te kutah hlan a ni a. Theiriat, Lungpuizawl leh Ṭawipui South-a lei min vanga chenna in chhia chhungkaw 9 hnenah State Disaster Response Fund (SDRF) aṭangin chhawmdawlna pawisa fai hlan ni bawkin, National Highway Infrastructure Development Limited (NHIDCL) leh a hnuaia contractor-te'n National Highway kawngpui laih vanga lei min tuartu khaw hrang hrangte hnena ṭanpuina leh chhawmdawlna sum an ruahman chu khawtlang hruaitute kutah hlan a ni bawk.

Lunglei DRDO Conference Hall-a hun buatsaihah Lunglei South bialtu MLA Pu Lalramliana Papuia chuan fur ruah sur avanga Mizoram hmun hrang hrangah leh Lunglei District-ah ngei pawh chhiatna leh harsatna hrang hrang a thleng chu pawi a tih thu sawiin, a tuartute a lainatin, a tuarpui tak zet tih a sawi a. Chhiatna leh harsatna thlengah khawtlang hruaitute leh tlawmngai pawl, a bikin Young Mizo Association (YMA) te'n rang taka mahni khawtlangah leh khaw ṭhenawm thlenga ṭan an la ṭhin chu lawmawm leh thlamuanthlak a tih thu sawiin, Lunglei Bawrhsap kaihhruainain DDMA leh department hrang hrangte'n inven, chhanchhuah leh chhawmdawlna kawngah rang taka chet an la nghal ṭhin chu thlamuanthlak leh lawmawm a tih thu a sawi a. Chhiatna leh harsatna tawkte chu sawrkar leh bialtu MLA-te'n an lainatin, a theihna apiangah ngaihvenin theih tawp an chhuah ṭhin tih sawiin, chhiatna hrang hrangte District-in mualpho lo leh ṭha taka a hmachhawn thei chu sawrkar leh mipuite thawh hona ṭha tak vang a nih thu a sawi a. Harsatna tawkte chhawmdawlna tura Disaster Management & Rehabilitation/DDMA, DonateKart Foundation, NHIDCL leh hna thawktu contractor-te thilphalna leh inpeknaah lawm thu sawiin, hun lo kal zel turah pawh khuarel chhiatna leh rikrum thil hmachhawn kawngah sawrkar department, khawtlang hruaitu, tlawmngai pawl leh mipuite inphut leh indem lovin, mahni theihna zawn ṭheuhvah theih tawp chhuaha thawk ho chhunzawm zel turin a chah.

Lunglei District Bawrhsap & DDMA Chairman Pi Navneet Mann chuan inlawmna thu sawiin, DDMA hma lakna tlangpui a sawi a. Mizoram leh Lunglei District-ah kum tin fur laiin chhiatna leh harsatna hrang hrang a thleng ṭhin tih sawiin, Lunglei District-a lei min tam zawk chu National Highway kawngpui laih vanga lei minin a thlen a nih angin pumpelh dan leh tihnep dan tur ngaihtuahin hotu sangah an thlen ṭhin thu leh hna thawktute pawh theih tawpa an tur ṭhin thu a sawi a. Sawrkar hotute, MLA-te, DDMA leh department hrang hrangte, khawtlang hruaitute leh tlawmngai pawlte nena thawh hona leh inpumkhatna ṭha tak avangin harsatna hrang hrangte sut kian a ni ṭhin chu lawmawm a tih thu sawiin, hun lo kal zel turah pawh thawh hona ṭha tak vawn zui zel a nih a beisei thu a sawi a. Harsatna tuarte ṭanpui tura lo pen chhuakte chungah lawm thu sawiin, tun ṭuma chhawmdawlna inhlan chu a tawpna tur a nih loh thu leh a ṭul anga chhunzawm zel a nih tur thu a sawi a. Mipuite chu chhiatna thlen thulhah a rang thei ang bera thuneitute hnenah thlen ṭhin turin a chah.

He hunah hian DDMA aṭangin Lunglei District Superintendent of Police Pu J. Lalmuankima leh member dangte, department hrang hrang hotute, YMA Sub-Headquarters Lunglei hruaitute, NHIDCL hotute leh contractor-te, chhawmdawlna dawngtu chhungkua leh khaw hrang hrang ai awh VC/LC leh YMA hruaitute an kal khawm a. Lunglei Sub-Deputy Commissioner i/c DM&R Pi Lalnunchhani Hnamte chuan hun kaihruaiin, YMA Sub-Headquarters Lunglei President Pu K. Lalfakzuala pawhin thu a sawi a. Chhiatna hmachhawn kawnga YMA Branch-te inpekna leh sawrkar hotute leh thawktu zawng zawngte hma laknaah lawm thu sawiin, YMA thuvawn chu "Ṭanpui ngaite ṭanpui" tih a nih angin YMA chu mi dang ṭanpui tur leh sawrkar hotute thawhpui turin a inring reng tih a sawi a. Chhawmdawlna hrang hrang inhlan a nih hnuah DDMA Vice Chairman, Lunglei DRDO Project Director Pi Zoramdini'n lawm thu sawiin hun a khar.

DonateKart Foundation aṭang hian Lunglei DDMA chuan tui-kawr (raincoat) 70, ṭhelret pheikhawk (gum boot) 50, kawr lang thei (life jacket) 15 leh first aid kit 36 dawngin, vawiina sem chhuah bak hi District chhung hmun hrang hrangah la sem chhuah tur a ni.

SDRF aṭanga chenna in chhia chhawmdawlna pekte chu – Theiriat aṭangin Pu L. Vanlalbiaka; Lungpuizawl aṭangin Pi Ngurchhawni, Pu Muankima, Pu K. Lalchhuanawma leh Pi Tlanghmingthangi; Ṭawipui South aṭangin Pi Lalremruati, Pu J. Patawia, Pu F. Lalhredika leh Pi S. Lalhmingchhuangi te an ni.

NHIDCL leh a hnuaia contractor-te hian Theiriat, Zobawk, Bualte, Dawn leh Ṭawipui South khawtlang hruaitute kutah lei min vanga chhiatna thlengah chhawmdawlna pawisa fai hlanin, he'ng khuate bakah hian Tlabung leh Hnahthial District-a khaw hrang hrang hnenah pawh ṭanpuina an lo hlan tawh bawk.