1315/2024-2025

2024 Vawkhniahzawn thla ni 25: Vawiin khan Lunglei South bialtu MLA Pu Lalramliana Papuia chuan Government Middle School, Thingfal te'n an kum 60 tlin, Diamond Jubilee lawmna hun an buatsaih chu Khuallian niin a hmanpui.

Govt M/S Thingfal Diamond Jubilee lawmna hi sikul hmunah buatsaih niin, Diamond Jubilee lungphun (monument) chu Khuallian Pu Lalramliana Papuia chuan a hawng a. Kan ramah zirna tuai thar a ngai tih sawiin, sawrkar pawhin zirna ngai pawimawhin tun hnaiah casual teacher eng emaw zat lak an ni a, Mizorama zirna hi rahbi sang zawk chuankaipui theih kan inbeisei a ni, a ti a. Kan ramah sawrkar sikul a tlabal chho mek a, sikul ṭha, hruaitu hmasate ṭhahnem ngaihnaa din leh hun rei tak lo kalpui tawhte a zuih zawnga a kal a hlauhawm tiin, sawrkar, khawtlang mipui leh zirtirtute ṭang hovin sawrkar sikulte a vul thar leh theih nan theih tawp chhuah a ṭul a ni, a ti.

Pu Lalramliana Papuia chuan tun sawrkara zirna siam ṭha tura an hma laknaah fimkhur leh khauh takin an kal dawn tih sawiin, zirna siam ṭhatna kawngah zirtirtute'n an pawimawhna hre thar leh turin a chah a. Zirtirtu hna chu hna zahawm tih ṭhin a nih laiin, a zahawmna chu mi hmuh danah innghat lova zirtirtute chet zia leh nun dana a innghah zawk thu sawiin, zirlaite ngaihsan hlawh pha lo zirtirtu chu a hnaah a hlawhchham sa a ni, a ti a. Zirtirtute chu hlawh hmuh nan chauh thawk lo va, zirlaite hma hun siamtu an ni tih inhria a, inthlahdah lova ṭang mar pat tur te, tun lai thiamna leh changkanna mila mahni intuai thar zel tur te'n a chah a. Zirlai an neih ṭhat danah GMS Thingfala thawktute'n ṭhahnem ngaihna tak tak nen sikul an kalpui nia a hriat thu sawiin, an ṭhahnem ngaihna keng nung zel a, sawrkar sikul vul thar leh nana theih tawp chhuah chhunzawm zel turin a chah a ni.

He hun hi School Headmaster Pu C. Lalrotluanga chuan kaihruaiin, inlawmna thu a sawi a. BCM Thingfal Bial pastor Rev. V. Biaknunsanga'n hunserh hmangin, School Teacher Pu T. Lalhmuliana'n sikul report a pek bakah, GMS Thingfala thawk tawh chatuan ram pan ta mi 10 te sunna hun hman a ni a. Govt M/S Thingfala thawktu hluite hnenah chawimawina hlan a ni bawk.

He hunah hian Lunglei South Sub-Divisional Education Officer Pu H. Sangthanga, Deputy DPC Pu L. Lalramliana leh Thingfal VCP Pi H. Malsawmkimi te pawhin thu an sawi a. Malzai leh thuchham te ngaihthlak niin, GMS Thingfal zirlaite aṭangin special item thlir ho a ni bawk a. Pu F. Zohmingthanga'n lawm thu sawia hun kharin, Diamond Jubilee lawmna ruai ṭheh zui nghal a ni.

Thingfal Middle School hi kum 1964 January ni 13 khan khawtlang mi pawimawh leh mi ṭhahnem ngaite hma laknain din a ni a. Kum 1970-ah deficit-ah hlan kai niin, kum 1972-ah sawrkar sikul puitlingah hlan kai (provincialised) leh nghal a ni a. A din tirh hian zirtirtu 4 awmin, zirlai 60 an nei a. Tun dinhmunah thawktu 9 (headmaster 1, teacher 7 & IV Grade 1) awmin, zirlai naupang 76 an nei mek a ni.