1195/2026-2027

Lunglei, 2026 Nikir thla ni 25: Vawiin khan Dingdong Park Ramtharah Lunglei District Arm Wrestling Association (LDAWA) chuan May 29 – June 2, 2026 chhunga Gujarat-a 4th National Armwrestling & Para Armwrestling Championship khelh zawh taka Mizoram ai awha khel Lunglei player medal latu mi 6 te chawimawina hun an buatsaih a. Lunglei South Bialtu MLA Pu Lalramliana Papuia chuan Khuallian niin hun a hmanpui. 

Khuallian Pu Lalramliana Papuia chuan khawvela mihring tamna ber, India ram mihring vaibelchhe 140 chuang zingah Lunglei infiam mi, arm wrestler-te’n hlawhtlinna an chang chu ropui a tih thu leh player-te chuan hma hun eng tak an neia a hriat thu sawiin, hlawhtling tura pawimawh em em chu promoter-te an nih thu leh talent nei ṭha tak takte pawh hlawhtlinna kawng zawhtir turin promoter ṭha an pawimawh thu a sawi a. Lunglei District Arm Wrestling Association-in player-te tan theih tawp an chhuahpuina rah a hmuh chu ropui a tih thu sawiin, arm wrestler-te’n hlawhtlinna an chan zel theih nan theih tawp chhuah a, a theih chin chinah ṭanpui zel a inhuam thu a sawi.

MLA Pu Lalramliana Papuia chuan hlawhtling turin mahni inthunun theihna (discipline) neih ṭhat a pawimawh thu leh tum fel tak neih lawk chu hlawhtlinna bul a nih thu sawiin, infiam mite chu tum ruhna leh inthunna nei tlat turin a chah a. Infiam mite theihna (talent) hai chhuah kawngah naupang an nih lai aṭanga hma lakpui a, ruahmanna fel tak nena enkawl a pawimawh thu sawiin, nu leh pa leh khawtlang hruaitute bakah, infiamna pawl hruaitute’n mawhphurhna thui tak an neia a hriat thu a sawi.

LDAWA President Pu K. Lalrinpuia chuan India ram pum arm wrestling intihsiakah Mizoram ai awhin Lunglei player 6 tirh an nih thu sawiin, an zavaia medal an la chu ropui leh lawmawm an tih tak zet thu a sawi a. Lunglei player-te chu Mizoramah pawh chhuanawm tak, Mizoram Arm Wrestling Association hruaitute pawhin an fak an nih thu sawiin, an kal leh zelna turah LDAWA chuan duhsakna sang ber an hlan tih a sawi.

Arm wrestler-te chawimawina inkhawm hi LDAWA Sr Vice President Lalnunpuia Tlau chuan kaihruaiin, Treasurer David J. Lalfakzuala’n hunserh a hmang a. General Secretary J. Lalzawmliana chuan report pein, National Armwrestling Championship-a Mizoram ai awha tel Lunglei player 6-in an zavaia medal an la chu thil chhinchhiah tlak, record hlu tak a nih thu a sawi a. LDAWA Executive Member Zothanpuii leh Lalnunmawii te’n player 6 te biangbiakna hun an hmang bawk.

National Armwrestling Championship 2026-a medal dawngtute chu he’ngte hi an ni:

(1)    B. Lalpekhlua, Venghlun – Gold [Sub-Junior (55 Kg)]

(2)    Reuben Lalhmangaihzuala, College Veng – Gold [Youth (60 Kg)]

(3)    Lalbiakfela, Rahsiveng – Silver [Junior (65 Kg)] & Bronze [Senior (65 Kg)]

(4)    Emily C. Rohluzuali, Venglai – Silver [Youth (50 Kg)]

(5)    Biaksiamliana, Venglai – Bronze [Youth (80 Kg)]

(6)    Joseph R. Lalruatdika, Electric Veng – Bronze [Senior (65 Kg)]

LDAWA chuan player-te hnenah hian chawimawina thu ziak, tawlhloh puan leh pawisa fai ₹2,000 ṭheuh an hlan.