4177/2024-2025

Lunglei, 2025 Ramtuk thla ni 10: Mizoram Ṭhalai Kristian Pawl (MṬKP) Inkhawmpui 2025 chu February ni 13 - 16, 2025 chhungin Lunglawn Mualah nghah a ni dawn a. He inkhawmpui chhunga lirthei tlan danah harsatna a awm loh nan Lunglei District Police te chuan a hnuaia mi ang hian ruahmanna siamin, lirtheia teivak leh mipuite'n zawm turin an ngen a ni.

I. Lirthei tlan dan tur:

Ni 13.02.2025 tlai dar 05:00 p.m. - ni 16.02.2025 zan dar 11:00 p.m. inkar, MṬKP Inkhawmpui chhungin heti ang hian lirthei a tlan ang:

1) Main Road (ATL Road) aṭanga Salem Veng peng kawngah hian chhuk zawng chauhin tlan thlak phal a ni a, District Road a zuk pawhna aṭanga chhim lam, Assam Rifles (3 Gate) inkar hi one way niin, chhim lam hawi zawng chauhin lirthei a tlan ang. District Road, Salem leh Lunglawn inrina aṭanga hmar lam chu a tawn tawna tlan theih a ni ang.

2) District Road (kawng hnuai)-a lirthei dahte chu 3 Gate lamah an haw ang. Hmar lam pan turte chu main road (ATL Road)-ah kalin, Akashvani Lunglei (All India Radio) kawng an zawh ang (One Way).

3) AOC Filling Station thlen hma Lunglawn kawng chung pan chhohna, Akashvani Lunglei (All India Radio) kawngah hian chho zawngin lirthei eng chi mah tlan phal a ni lo a, he lai veng hnaia chengte tan chuan ṭul bikah Traffic duty leh volunteer duty-te ruahmanpuinain an chenna in thlengin tlan chhoh theih a ni ang.

4) Main Road (ATL Road) chu a flow pangngaiin a tawn tawna tlan theih a ni ang.

5) Lunglawn Mual/Field pan thlakna kawngah hian official-te lirthei chauh chhuk zawngin tlan luh phal a ni a, chho zawngin lirthei tlan phal a ni lo.

6) Inkhawmpui chhungin Salem leh Lunglawn Veng pal tlang tur Heavy Motor Vehicle (HMV), Medium Motor Vehicle (MMV) leh Oil Tanker te chu dar 02:00 p.m. - 09:00 p.m. inkarah kal tlang phal a ni lo.

II. Inkhawmpui palai lirthei dahna tur leh veng chhung mipuiin lirthei dah theih lohna hmun:

1) Salem leh Lunglawn huam chhung kawng sir, Garage leh Private Parking place tih loh, kawngpui area-ah eng lirthei mah veng chhung mipuiin dah lo tura ngen leh hriattir an ni.

2) Main Road (ATL Road) AOC aṭanga Lunglawn 3 Gate inkar kawng sir hi inkhawmpui palaite lirthei dahna hmun atan ruahman a ni.

3) District Road, Anganwadi Centre aṭanga Filling Station hlui inkar kawng sir remchang lai hi official-te parking atan reserve a ni.

4) District Road, Anganwadi Centre aṭanga 3 Gate inkar kawng sir hi inkhawmpui palaite lirthei dahna tur atan ruahman a ni.

5) District Road, Filling Station hlui aṭanga Government Press inkar kawng sir hi inkhawmpui palaite lirthei dahna tur atan ruahman a ni.

6) AOC Filling Station thlen hma Lunglawn kawng chung pan chhohna aṭanga Lunglawn Bus waiting shed inkarah veng chhung mipuiin kawng sirah lirthei dah loh tur a ni. [Akashvani Lunglei (All India Radio) kawng]

III. Dropping/Picking Zone:

He'ng hmunte hi dropping leh picking atan hman tur a ni.

1) Main Road (ATL Road), Lunglawn field peng opposite.

2) District Road, Pu F. Lallunghnema In leh Anganwadi Centre inkar.

3) District Road, Filling Station hlui.

4) Main Road (ATL Road) Forest Check gate bul.

Tin, lirthei neitute'n kan lirthei dashboard/windshield-ah mobile phone number, a ṭul huna biak pawh theihna turin dah ṭheuh kan tum dawn nia.

Ruahmanna hian dan leh thupek kengkawhtu Police, Magistrate, Quick Response Team, Fire & Emergency Service, Medical Duty te a huam lo ang.