Vawiin khan Lunglei SP thar Pu Zosangliana chuan Lunglei leh chhevel Veng hrang hrang 12 atangin VDP member-te kokhawmin SP's Conference Hall, Lunglei-ah meeting pawimawh tak a neihpui a. He meeting-ah hian Lunglei SDPO Pu B.Laldingngheta pawh telin Dan hnuaia VDP te thuneihna leh an tih tur/tih loh turte inhrilhfiahna hun hman a ni.

Lunglei SP chuan VDP member kalkhawmte fuihin kumin 2014 Krismas leh Kumthar mipuiten thlamuang leh hlim taka an hman theihna turin hmalak ho dan a sawipui a. Zan lampanga lirthei bengchheng tak taka tlan thinte tihreh dan tur pawh an thurel zingah a tel a ni. Lunglei SP chuan Mizote hunpui lo thleng turah tun hma aia nasa leh zuala tan la tur leh Police-te nena tangho zela thawk turin VDP zawng zawngte chu a sawm a ni.