Vawiin zing dar 7:30 AM khan Venglai Traffic point, Lunglei ah Zoram Driver’s Union Sub Hqrs Lunglei buatsaih in Road Safety Week vawi 37 na chu Pu J.Lalthafamkima, Superintendent Of Police, Lunglei in ribbon chep chat in a hawng.

Road Safety Week hawnna inkhawm hi Pu Zairemthanga Sailo, president, ZDU Sub Hqrs Lunglei in kaihruai in Pu J.Lalthafamkima chuan Road Safety Week (Fimkhurna Hapta) hi Mizoram Distrit pariat ah hawnna hun hman mek a ni a, Lunglei ah pawh ZDU hmalakna in hmang thei a kan awm hi a lawmawm a ti a, ZDU hmalakna hi traffic police bak ah Lunglei District a Police Station pariat pawhin a tawiawm dawn a ni. Hunpui lo thleng tur ah hian lirthei khalhtu te a bik takin tleirawl te chetsualna lak a fimkhur turin a duh a, lirthei chetsualna pumpelh theih nan theihtawp a hmalak a nih tur thu sawi in, Road Safety Week hi week chhung chauh ni lovin kumtluan a hmang theuh turin driver te a chah a ni. Rui chung leh document fel lova lirthei khalh, dan bawhchhia te chu Dan ang a hrem an ni ang a ti. Driver ten man kher ngai lovin motor document fel leh Dan zawm theuh turin a duh a, Road Safety Week thupui ‘Fimkhur la nun chhanhim rawh’ tih angin mipuite leh driver ten chetsualna a thlen loh nan tawiawm theuh turin a duh a ni.

Pi Saizikpuii, DTO, Lunglei pawhin thu sawi in Lunglei ah motor registration hi a pung chak a, october 2017 khan official in MZ-02-A atangin B ah hlankai a ni a, driver mawhphurhna hrelo te hian kawngpui leh mipuite tan harsatna an thlen thin a ni. Kum tling lo motor khalh tir tu leh khalhtute hi Motor Vehicle Act hmangin  hrem theih a ni a, chuvangin kan fa te an him nan kum tling lo chung a Driving License dilsak leh lirthei khalh tir lo turin nu leh pa te a duh thu a sawi. Zu rui chung a motor khalh hian fimkhurna kan tlachham a, chuvangin ruih nei chung a motor khalh hi kan tih tur a ni lo a ni a ti. Document leh License fel lo te tan late fee chawi ngai lovin tihfel theihna hun siam thuai a nih tur thu a sawi bawk.