3426/2023-2024

LUNGLEI the 22nd January, 2024: Vawiin khan Lunglei Venglai Branch YMA chuan an din champha phak vawi 50-na Saikuti Hall ah ropui takin an lawm. Venglai YMA Golden Jubilee inkhawmah hian Pi Ramdinliani, IAS Deputy Commissioner,Lunglei chuan khuallian niin a hmanpui.

Golden Jubilee lawmna inkhawm  Pu Malsawmdawngliana, YMA ,President kaihhruaiah khuallian Pi Ramdinliani chuan Venglai YMA ten Pathian kaihhruaina changa Kum 50 hmel an hmu chu a lawmpui thu sawiin;  YMA chu tanpui ngaite tanpuitu a nih angin miharsate leh hmeithai,tar chak lo te thleng pawha chhawmdawl an ngaih chang pawha tlawmngaih chhuah hmasa tu ni zel turin a chah a. Ruihhlo hluar lutuk tur ven kawngah pawh sorkar tanpuitu ber ni zel turin a chah bawk a ni.

Khuallian Pi Ramdinliani chuan Golden Jubilee monument, Old Tennis Court bula mi chu hawnna neiin Jubilee pual Souvenir a tlangzarh bawk a ni. Venglai YMA te hian an Jubilee lawmna pualin Lunglei thalai te tan January ni 20, Inrinni zan khan Old Tennis Court- ah Mizoram huapa zai thiam tak tak te chahin free concert hlung tak an lo nei tawh bawk a ni. Venglai Branch YMA Golden Jubilee hi Sunday anih avangin vawiin ni 22.1.2024 (Thawhtan) hian hman a ni.

Venglai Branch YMA hi kum 1974, January ni 21-khan din a ni a, tun dinhmunah member 1400 awmin, mipa-900 leh hmeichhia-500 an awm a ni. Jubilee pual hian tlailamah khawtlang huap ruai ropui taka theh tur a ni bawk.