4437/2024-2025

Lunglei, 2025 Ramtuk thla ni 25: Vawiin khan Lunglei West bialtu MLA Pu T. Lalhlimpuia chuan Lunglei District Jail tlawhin, SASCI (Scheme for Special Assistance to States for Capital Investment) sum hmanga District Jail sak dan tur ruahmanna a hmunah a enfiah.

Lunglei West bialtu MLA Pu T. Lalhlimpuia hi Lunglei Municipal Council (LMC) Ward No. V Councillor Pi Zonunmawii leh Lunglei District Superintendent of Police (SP) Pu J. Lalmuankima te'n ṭawiawmin, District Jail-a thawktute'n an lo dawngsawng a. Jail hmunhma te fang kualin, thawktute'n District Jail-in a mamawh thil hrang hrang an lo thlen chu ngaihthlaksakin, a theih anga an mamawh ngaihtuahpui a tum thu a sawi.

Pu T. Lalhlimpuia chuan District Jail-a duty Mizoram Home Guard Civil Defence barrack chhe tawh tak sak ṭhat dan tur te a enpui bawk a. SASCI suma Lunglei District Jail sak ṭhat dan turah ruahmanna (estimate) ang thlap leh mamawh phuhru zo ngei tura ṭha taka hna thawh chu sawrkarin a duh ber a nih thu sawiin, hna ṭha chiah an beisei thu a sawi.

LMC Ward No. V Councillor Pi Zonunmawii chuan District Jail-a duty-te mamawh em em sintex chu an mamawh ang zat pek an nih tur thu a sawi ve bawk.

Tun dinhmunah Lunglei District Jail-ah hian mi tang hmeichhia 15 leh mipa 105 an awm mek a. Thawktu guiding staff mipa 18 leh hmeichhia 9 an awm mek bawk.