1027/2026-2027

Lunglei, 2026 Nikir thla ni 16: Vawiin khan Lunglei West bialtu MLA Pu T. Lalhlimpuia chuan Mizo Upa Pawl (MUP) Venghlun Unit (Lunglei) Golden Jubilee lawmna chu Khuallian niin a hmanpui.

Venghlun Indoor Stadium-a Jubilee lawmna hun hmanah Khuallian Pu T. Lalhlimpuia chuan MUP Venghlun Unit-in kum 50 tlinga Golden Jubilee an lawm thei chu a lawmpui thu sawiin, hruaitu hmasate leh tuna hruaitu leh member ni mekte zahna chibai a buk a. MUP Venghlun chu kum 50 chhung zet khawtlang tana eng leh lungphum pawimawh tak, inkaihhruaina dik leh nunphung mawi zirtirtu an lo ni tawh tih sawiin, ṭhalaite'n an hnen aṭangin zir tur leh entawn tur tam tak an neih thu a sawi a. Khawtlanga mi hlawhtling tak tak chher chhuaktu pawh upate an nih thu sawiin, khawtlang leh hnam nuna upate thurawn leh an hlutna chu eng tikah mah ngaihnep theih a nih loh thu a sawi.

Pu T. Lalhlimpuia chuan a bial chhungah inkal pawhna kawngpui ṭha leh zirna lama hmasawnna a awm theihna tur te, damlo buaipui leh kan chungchangah leh hmasawnna ruhrel hrang hrang din turin theih tawp a chhuah thu sawiin, thil tam tak tih theih ni lo mah se, dik taka tih chu a thupui a nih thu a sawi a. Upate chu khawtlang leh ram tan ke pen zel tur leh tun lai thiamna mila inzir belh zel tura chahin, kawng tinrengah hma sawn zel tur leh khawtlang tana malsawmna ni zel turin duhsakna a hlan.

MUP Venghlun Unit Golden Jubilee lawmna hi President Pu PC Ramnela'n a kaihruai a. Unit member chatuan ram pan tawhte sunna hun hman niin, Rev. P. Lalthanga, Executive Committee Member chuan hunserh a hmang a. Secretary leh Treasurer report ngaihthlak niin, Souvenir tlangzarh a ni a. Lunglei Municipal Council (LMC) Ward No. IV Councillor Pu R. Lalramzauva bakah, MUP Headquarters, Venghlun Local Council, YMA Venghlun Branch leh MHIP Venghlun Branch ai awhte aṭangin thu sawi ngaihthlak a ni a. Hruaitu lo ni tawhte leh member kum 90 chung lamte chawimawina hun hman niin, Pu R. Romuana'n lawm thu a sawi a. Pu CH Lawmthanga (ECM) chuan ṭawngṭaiin hun a khar.

MUP Venghlun Unit hian Section-I huam chhung Venghlun Waiting Shed bulah Golden Jubilee hriat rengna lung an phun a. Golden Jubilee Lungphun hi Vice President Rev. C. Zohmingliana kaihhruaiin a hawnna hun buatsaih niin, Pi Chalkungi (kum 96) chuan a hawng a. Golden Jubilee dar vuak ni bawkin, tlai lamah Golden Jubilee lawmna chawhlui kil ho a ni bawk.

Mizo Upa Pawl Venghlun Unit hi June ni 16, 1976 khan din a ni a. Tunah hian member 187 an awm mek.