580/2025-2026

Lunglei, 2025 Ṭomir thla ni 13: Vawiin khan Lunglei District Disaster Management Authority (DDMA) Chief Executive Officer Pi Rochuangkimi Khenglawt chuan hriattirna chhuahin, May ni 15, 2025 (Ningani) zan dar 8:30 aṭanga dar 8:35 chhungin Lunglei khawpui chhung Black Out (tihthim) Mock Drill neih tura ruahman a nih thu leh hemi hun chhung hian Lunglei khawpui chhunga eng (light) zawng zawng tihthim tur a nih thu a tar lang a. He Black Out Mock Drill neih lai hian a hnuaia mite hi zawm turin hriattirna a chhuah:

"1. Ni 15.05.2025 (Ningani) zan dar 8:30 pm-ah Lunglei khawpui chhung veng tinah VC information (tlangauna) aṭangin minute khat (1) chhung Siren tihrik a ni ang a, Siren rik rual hian veng chhunga eng (light) zawng zawng tihthim nghal tur a ni. He Black Out Mock Drill hi 8:30 PM aṭangin 8:35 PM thleng a ni ang.

"2. Black Out Mock Drill neih chhung hian mi tinin eng (light) pe chhuak thei zawng zawng - light, inverter, street light, mobile phone, torch light, mombati, etc. te tiamin tihthim vek tur a ni ang.

"3. Lirtheia tlan laite pawh mahni awmna hmunah engine off-a dingin, motor light pawh tihthim vek bawk tur a ni ang.

"4. Mihring chenna in ni lo - biak in/community hall/ sikul/office leh vantlang inṭawm building-a light eng thei zawng zawng tithimtu tur lo inruat ṭheuh tur a ni ang.

"5. He Black Out Mock Drill neih lai hian Kohhran/Pawlin programme an lo nei a nih pawhin hemi hun chhung hi chuan light off vek tura ngen leh hriattir an ni.

"6. He Black Out Mock Drill neih chhung zawng hian Lunglei khawpui chhung veng tina Local Council leh YMA ṭheuhte'n lo en zui/vil bawk tur a ni.

"He Black Out Mock Drill neih tur hi tun lai India leh Pakistan boruak avanga Civil Defence Air Raid Mock Drill peng pakhat a ni a, India ram puma kan Civil Defence System dinhmun enna tur leh a taka vansang aṭanga beihna kan tawh palh pawha hmelma laka himna atan a pawimawhzia inzirtirna tur a ni. He Black Out Mock Drill hi Lunglei khawpui chhunga hlawhtling taka hman a nih theih nan ruahmanna siamte hi zawm ṭheuh turin Lunglei mipuite kan ngenin, kan inhriattir e."