No.548/2021-2022

Lunglei the 17th May, 2021 – Tun hnaia Mizoram hmun hrang hranga kangmei chhuak chhui chiang tur leh hemi kaihhnawiha dan dinglai awm mek te zirchiang a, a tul anga hmalak dan tur rawtna siam tura Mizoram sawrkarin a ruat State Level Special Investigation Team on Fire Outbreak hovin vawiin khan Video Conference kaltangin Lunglei District official-te nen meeting neih a ni.

He hunah hian SIT Chairman Pu R.S Sinha, Chief Conservator of Forests (Administration),leh member dangte Pu C. Lalthanmawia, Director, Fire & Emergency Services, Pu Lalthafamkima Jongte, AIG (Ops), Police Headquarters leh Pu John LT Sanga, Director, Disaster Management & Rehabilitation an tel a.

Lunglei District atangin Lunglei DC Pu Kulothungan A, SP Pu Rex Zarzoliana Vanchhawng, Conservator of Forest, Southern Circle Pi Lalrammawii Sailo leh sawrkar official dangte bakah Sub Hqrs YMA leh Lunglei District VC Association hruaitute an tel a ni.

Meeting-ah hian Lunglei District-a kangmei chhuah dan te, a chhuahna hmun te, kangmei thelh a nih dan leh hemi chungchanga investigation kal mek te sawiho anih bakah kangmei hmachhawn tura hmanrua leh mihring neih dan te uluk taka thlirho a ni. SIT Chairman Pu R.S Sinha chuan kangmei chhuah chhan, hemi kaihhnawih a dan hman mek te leh kang meiin thil a tihchhiat chungchang te chipchiar taka zir tura sawrkarin SIT chu a ruat thu sawiin July thlaah sawrkar hnenah rawtna an thlen thur thu a sawi.

Lunglei DC Pu Kulothungan A chuan report pe in tun hnaia Lunglei District-a kangmei chhuak kha a zavaiin a area 2061 hectare (approximate) a chhut niin District chhunga Village Council 32 area huamchhungah kangmei hi a chhuak a ni, a ti a. Zotlang VC area chu kangmei tuar nasa ber niin ram zau zawng hectare 645 kang a chhut a ni a. Kangmei a nasat laiin Lunglei khawpui chhungah chhungkaw 51-te inthiarchhuah tir niin in leh lo chan lovin heng chhungkua te hi an let leh vek a. Kangmei chhuak thelh tur hian mi tlawmngai tam tak rawn pen chhuakin nunna chan emaw na taka inhliam an awm lo a ni. Lunglei DC chuan District Disaster Management Authority meeting a remchan anga koh thuai a tum thu a sawi bawk.

Kangmei chhuah dan leh a chhuah chhan chhui hna kal mek chungchang Lunglei SP Pu Rex Zarzoliana Vanchhawng chuan a report a. Kangmei chhuah ni April ni 24 khan Intelligence Branch, Lunglei Police ten investigation kalpui nghalin kangmei chhuah ni a a bula ram kal nia hriat mi pali (4) pawh interview tawhin an statement lak a nih tawh thu a sawi a. April ni 27 khan Lunglei SDPO Pu Lalfakmawia kaihhruaiin District-ah Special Investigation Team din niin a chhui chian hna hi la kalpui mek zel a ni. Hemi chungchangah hian Lunglei Police Station chuan FIR an dawn tawh thu Lunglei SP chuan a tarlang bawk.

Meeting-ah hian kangmei chhuah thulha rang zawka chetlak anih theihna tura hmalak tul te, bungrua mamawh te, awareness program kalpui dan tur te, kangmei thelh tura mi thlanchhuahte training pek dan tur te, kangmei chhuah thulha rang taka mipuiin report an thehluh theih dan tur te, hemi chungchanga technology hman tangkai theih dan te, leh YMA leh khawtlang hruaitute leh mipuite nena thawhhona tha chhawm nuna, tuna aianasa zawka hmalak tlan zel dan tur te sawiho a ni.