4295/2024-2025

Lunglei, 2025 Ramtuk thla ni 17: Vawiin khan Lunglei District Walkathon Sub-Committee chu an Chairman, Additional Deputy Commissioner Pu James Miahlung hovin Lunglei DC Conference Hall-ah an ṭhu khawm a. Mizoram Health Systems Strengthening Project (MHSSP) hma lakna hnuaia March ni 3, 2025 (Thawhṭanni)-a Lunglei khawpui chhunga walkathon buatsaih tur chungchang an sawi ho.

Mizoram mipuite kan lo hrisel zawk nan MHSSP hnuaiah "hriselna atan kea kal", (walk for health) thupui neiin, Mizoram pumah village level leh district level walkathon buatsaih tura ruahman a ni a. Lunglei District-ah chuan khaw 114-ah buatsaih tum a ni a. Vawiin hian Lunglei khawpui chhung bika hun hman dan tur sawi ho niin, block leh village level-a hun hman dan tur chu BDO-te hova ruahman tur a ni.

Lunglei khawpuia walkathon buatsaih turah hian YMA, kohhran ṭhalai leh college NSS leh sikul zirlaite tel tura beisei niin, a ṭul angin sawmna siam ni se, tih a ni a. District Level Walkathon Ambassador atan mi pathum ruat an ni bawk.

March ni 3 hian zing dar 7:30 leh 8:30 inkarah walkathon hi buatsaih tura ruahman niin, innghah khawmna atan chhim lamah AOC Veng leh hmar lamah Kikawn ruat a ni a. Innghah khawmna hmun aṭang hian Lunglei Venglaia Tennis Court hlui panin kea kal tur a ni dawn a, hemi hmunah hian a kharna hun buatsaih a ni ang.