Lungleiah 12th Mizoram State Anti-Tobacco Day 2025 hman niin, Tobacco Free Youth Campaign 3.0 hawn a ni
2031/2025-2026
Lunglei, 2025 Khuangchawi thla ni 31: Mizorama vaihlo leh a kaihhnawih dona ni, Mizoram State Anti-Tobacco Day (MSATD) vawi 12-na chu vawiin khan District Bawrhsap Pi Navneet Mann hovin Lungleia School Education Complex Conference Hall-ah hman a ni a. Lunglei District-a ṭhalaite zuk leh hmuama an fihlim theih nana beihpui thlak tur, "Tobacco Free Youth Campaign (TFYC) 3.0" chu District Bawrhsap hian a hawng nghal bawk.
National Health Mission (NHM), Mizoram hnuaia Lunglei District Tobacco Control Cell (DTCC) huaihawta MSATD leh TFYC 3.0 puala hun hmanah hian Khuallian, Bawrhsap Pi Navneet Mann chuan vaihlo, zuk leh hmuam chu ngawi renga nunna suattu hlauhawm ber pakhat a nih thu sawiin, India ramah kum tin mi nuai 13 chuangin an thihpui tih a sawi a. Nunna suattu tûr hlauhawm ber pakhat chu do a ṭul tak zet tih sawiin, a dona leh tihremna kawngah sawrkar mai ni lovin, tlawmngai pawl, kohhran leh mi tin ṭang tlanga beih a ṭul thu a sawi a. Ṭhalaite an hrisel a, zirna leh eizawnna lama an insawr bing theih nan leh ram tana chhawrnahawm an nih theih nan zuk leh hmuama an fihlim a pawimawh thu sawiin, zuk leh hmuam ti tawhte'n an sim a, a la ti lote ven him an nih theih nana beihpui thlak turah chuan District mipuite ṭang tlang turin a sawm.
Lunglei District Senior Chief Medical Officer Dr Lalrinthangi'n hun a kaihruai a. Lunglei DTCC-a District Consultant Dr Lalnunsiama Renthlei chuan "Zuk leh hmuam tel lo nun dan changkang" (Tobacco Free Lifestyle) tih thupui hmangin zuk leh hmuamin hriselna a nghawng pawi theih dan leh a laka fihlim tura inzirtirna hrang hrang a lem nen entirin a sawi fiah a. Lunglei District Education Officer Pu Micky R. Lalenkawla pawhin zirna inte vaihlo leh zuk leh hmuam laka an fihlim theih nana hma lakna, Tobacco Free Educational Institution (ToFEI) chungchang sawi zauvin, zirtirtute leh zirlaite chu ToFEI hlawhtlin nan theih tawp chhuah turin a chah a. Intihsiakna hrang hrang lawmman sem niin, Lunglei DTCC-a Social Worker Pu Vanlalruata'n lawm thu sawiin hun a khar.
He hunah hian intihsiakna hrang hrang lawmman heti ang hian sem a ni:
A. ToFEI hnuaia zuk leh hmuama fihlimna kawnga hma la ṭha zirna inte:
Primary School - Govt Ramthar PS, Lunglei (97%)
Middle School - Govt Mt Hermon MS, Lunglei (98%)
High School - Govt Leitlangpui HS, Lunglei (97%)
Higher Secondary School - Baptist HSS, Serkawn (97%)
B. Nasha Mukt Bharat Abhiyaan (NMBA) hnuaia ruihhlo dona kawnga hma lakna:
I. Drawing Competition:
(1) 1st - Vanlalhruaia Ngente, Sacred Heart School, Lunglei
(2) 2nd - H. Lalrinzuali, Govt HS, Lunglei
(3) 3rd - Angela Hmangaihzuali, Baptist HSS, Serkawn
(4) Consolation Prize - R. Lalnunhlimi, SHS & Samuel Malsawmzuala, SHS
II. Slogan Writing Competition:
(1) 1st - Mary R. Lalruatsangi, Govt HS, Lunglei
(2) 2nd - LH Roluahpuii, Govt HS, Lunglei
(3) 3rd - R. Laldinpuia, Govt Electric HS, Lunglei
(4) Consolation Prize - Christina Zothantluangi, Govt Leitlangpui HS & CS Lalfakawmi, Govt Leitlangpui HS
C. Lunglei Municipal Council (LMC) Drawing Competition on Cleanliness:
I. Primary School:
(1) 1st - Lalrindika, Govt Model PS, Lunglawn
(2) 2nd - Angie MS Dawngliani, Govt PS, Lungpuizawl
(3) 3rd - Remruatpuia, Carey English School, Zotlang
(4) Consolation Prize - Mi 10 tan
II. Middle School:
(1) 1st - Esther Vanlalmuanawmi, Holy Faith School
(2) 2nd - F. Vanlalawmpuii, Baptist English School, Serkawn
(3) 3rd - Lalmalsawmkimi, HFS & R. Remruatsaki, Public English School, Zobawk
(4) Consolation Prize - Mi 10 tan
III. High School & Higher Secondary School:
(1) 1st - H. Lalrinzuali, Govt HS, Lunglei
(2) 2nd - Rajorshi Dewan, JNV Pukpui
(3) 3rd - V. Malsawmkima, Holy Faith School
(4) Consolation Prize - Mi 10 tan
He'ng bakah hian Lunglei District chhunga PM SHRI school: Govt Mamte PS, Govt Model PS-I, Govt Tuichawng PS leh Eklavya Model Rsidential School, Pukpui te hnena rimawi tumna bungrua - guitar panga leh keyboard pariat ṭheuh pek tur chu Khuallianin a danwgtu turte kutah a hlan bawk.
Mizoram State Anti-Tobacco Day hi Mizoram Sawrkar hma laknain kum 2014 aṭang khan kum tin September ni 11-ah hman ṭhin a ni a. Kuminah rokhawlhna avanga a huna hman theih a nih loh avangin, vawiin khan hman a ni a. TFYC 3.0 hi October ni 9 aṭanga ni 60 chhunga hman tur a ni bawk.
Global Adult Tobacco Survey (GATS)-1 (2009 – 2010)-in a tar lan danin Mizoram mipui 67.2%-in vaihlo zuk leh hmuam eng emaw tal ti/hmangin, India ram pumah Mizoram hi pakhatna a ni a. GATS-2 (2016 – 2017)-ah Mizorama vaihlo kaihhnawih hmang hi 58.7%-ah tla hniamin, Tripura dawtah Mizoram chu awmin zuk leh hmuam hmang/ti nasa pahnihna a ni a. GATS-1 (2009 – 2010)-in a tar lan danin Mizoramah in chhung (home)-a mi mei zuk khu hipa secondhand smoke tuartu 96.5% an awm laiin, GATS-2 (2016 – 2017)-ah chuan 84.1%-ah a tla hniam a ni.
Global Youth Tobacco Survey-4 (2019)-in a tar lan dan chuan Mizorama zirlaite zingah vaihlo leh a kaihhnawih eng emaw tal hmang/ti 58% an awm bawk a. TFYC kal tlang hian ṭhalaite leh zirlaite zuk leh hmuama an fihlim theih nan ngawrh taka hma lak a ni ang.
