996/2024-2025

LUNGLEI; the 28^th June, 2024: Economics & Statistics Department Lunglei buatsaihin vawiin chawhma khan Lunglei Press Club-ah " Use of Data For Making Decision" tih thupuia hmangin National Statistics Day Vawi 18-na pualin hun hman a ni a, Pu K.Lalrinawma Vice Chairman Lunglei Municipal Council chuan khuallian niin he hun hi a hmanpui.

National Statistics Day vawi 18-na puala inkhawm hi Pu T.C.Zonunsanga District Research Officer, Lunglei chuan kaihruaiin, National Statistics Day lo pianchhuah dan leh ram hmasawnna atan statistics chuan hmun pawimawh tak a chang chho mek tih sawiin, kalkhawmte chungah lawmthu a sawi bawk. Khuallian Pu K.Lalrinawma LMC Vice Chairman chuan thu sawiin, thil diktak leh nihna diktak hrelo a thutlukna siam hi a him lo thin tiin, sawrkar pawhin a hmalakna tur kawng hrang hrangah dik zawka tih a nih theih nan research base a hmalak a tum a ti. Statistics neih that chu hriselna leh zirna kawngah hmalakna atan a tangkai hle a ni, a ti. Statistics mumal neilo a hmalak chuan tulloah sum leh bungrua emaw mihring emaw kan khawhral vak thin a chuvangin kan hmalakna tur reng rengah statistics mumal tak neia hrechiang taka hmalak chu a felfai bik a ni, a ti. Thutlukna siam dawnin a tangkaina tur leh a hlawkna tur chiang taka hre hmasa in thutlukna kan siam thin tur a ni a, Statistics Day vawi 18-na thupui thutlukna siam nan Data tha tak neih tih chu thil diktak a nih avangin hman tangkai ngei kan tum a pawimawh a ti bawk. Lunglei Municipal Council chungchang sawiin Lunglei khawpui chhunga lirthei chet vel dan leh lirthei dahna chungchanga hmalak an tum mek dan te, building regulation kalpui an tum mek dan leh Property Tax lak an tum dan te tarlangin heng atanga Tax lut zawng zawng hi LMC huam chhungah hman tangkai a ni dawn tiin, assessment pawh lak tawh a ni a ti a, faina kawngah pawh nasa zawka hmalak a, bawlhhlawh sawng bawlna mumal zawk siam tum a nih thu te a tarlang.

 Vawiina Statistics Day puala hun hmannaah hian Pu P.C. Vanlalrova, Inspector, DRO Office Lunglei chuan Statistics Day lo chhuah dan sawiin, India ram a indan hlim khan thil tam tak siamthat ngai a awm a, Sawrkar hruaitute leh mithahnemngai ten ram siamthat dan nasa takin an ngaihtuaha, chutianga hmalakna kal zelah sawrkar laipui chuan Statistics pawimawh zia hriain kum 18 kalta khan Father of Statistics, Prof. Prasanta Chandra Mahalanobis piancham June ni 29 chu National Statistics Day atan a lo puang ta a, kuminah hian June ni 29 hi Sawrkar chawlh a nih avangin June ni 28 ah Statistics Day hi Mizoramah chuan hman a ni, a ti.