Vawiin chawhma dar 11:00 khan Lunglei Civil Hospital-ah 3rd Mizoram State Anti-Tobacco Day hman a ni a. Dr. S.R. Ngurchamliana, District Nodal Officer, NCTP Lunglei chuan programme kaihruaiin, Lunglei DC Pu Abhijit Vijay Chaudhari, IAS chu Khuallian a ni.

Pu Abhijit Vijay Chaudhari chuan khawvelah vaihlo avanga thihna a nasa in, Mizoramah pawh vaihlo leh a kaihhnawih natna cancer avanga thi kan pung chho zel a ti a. Mizoramah mihring 67.2% zetin vaihlo hmang in, India ram state zingah pawh kan filawr hle a ni, a ti. Cancer natna mai bakah vaihlo in natna dang a thlen, Non-Communicable Disease (NCD) vei pawh kan pung nasa em em a ti a. Mipuiten hriselna kawnga hma kan sawn nan leh kan tu leh fate vaihlo laka an fihlim chhoh zel nan mahni in chhungkhur atanga zirtirna bul tanin, Tobacco Free Generation-vaihlo zuk leh hmuam laka fihlim thangtharte siam turin theih tawp chhuah theuh turin kalkhawm te a sawm a ni.

Pu R. Lalnghakliana, Inspector, Legal Metrology pawhin cigarette an man te chu an hlauhawm bik avanga man an nih loh thu a sawi a. India ramah chhiah pe lova ramri kan an nih vang leh The Legal Metrology Package Commodities Rules kalh a nih avanga man an nih thu a sawi. Legal Metrology, District Anti-Tobacco Squad leh Police tangrual te chuan dan lova zawrh foreign cigarette packet 369 an man thu a sawi bawk.

District Consultant Dr. Lalnunsiama Renthlei chuan April leh August thla chhunga NCTP Activity report a pe a. Vaihlo leh a kaihhnawih thatlohzia zirtirna school 39-ah an nei a ti a. Puipunna hmuna meizial zu vaiin vawi 14 thawk chhuak in, mi 18 an man atangin cheng 1000 an hmuh thu a sawi. Heng bakah NGO 6-te hnenah vaihlo chungchanga zirtirna nei in, trainer-te tan training vawi 2 an buatsaih tawh a ti a. Mi 222-in Tobacco Cessation Clinic chu pan tawh in, mi 29-in an nghei hlen tawh a ni, a ti bawk.

Lunglei Superintendent of Police Office chu Lunglei District-a Cigarette and Other Tobacco Products Act, 2003 Section 4 hmanga vaihlo dona kawnga thawk tha ber lawmman hlan a ni a. Cigarette man te tihchhiatna hun chu Lunglei Chief Medical Officer Dr. VLMS Dawngliana kaihhruaiin programme zawh ah hian hman a ni.

September ni 11, 2014 khan a vawi khatna atan Mizoram State Anti-Tobacco Day hman a ni a. Kumin atana thupui chu Tobacco Free Generation-vaihlo zuk leh hmuam laka fihlim thangtharte a ni.