2124/2025-2026

Lunglei, 2025 Mimkut thla ni 13: India Independence Day vawi 79-na puala 2nd Battalion Mizoram Armed Police (MAP), Luangmual, Lunglei Friendly Futsal Tournament buatsaih chu nimin khan LDF Futsal Ground, Sethlunah a hmawr bawk fel niin, Commandant Team an champion.

Mizoram Police Headquarters hotute thu chhuakin police te'n taksa hriselna kawnga hma an sawn theih nana kumin Independence Day puala infiamna buatsaih tura battalion hrang hrangte a hriattirna bawhzuiin, 2 MAP Commandant Pu Francis Lalnuntluanga Ralte ruahmannain he tournament hi buatsaih a ni a. August ni 29, 2025 (Zirtawpni) khan LDF Futsal Ground, Sethlunah tournament hi khelh ṭan niin, 2MAP-a thawktute chu team 7 – (1) Commandant Team, (2) Second-in-Command Team, (3) Adjutant Team, (4) Assistant Commandant Team, (5) Medical Officer Team, (6) Administrative Inspector Team, leh (7) Record Officer Team-ah te an inṭhen a ni.

Tournament hi league system-a khelh (intum kual chhuah) niin, a point hmu sang team 4 te'n semi-final an khel a. Semi-final-a chak zawk team 2 te'n final khelin, a chak lo team 2 te'n pathumna an inchuh bawk.

Nimin chawhnua LDF Futsal Ground, Sethluna a hmawr bawkna hun buatsaihah 2MAP Team leh SP Team te'n Exhibition Match an khel a. SP Team hi Lunglei SP Pu J. Lalmuankima'n hovin, 2MAP Team hi Commandant Pu Francis Lalnuntluanga Ralte chuan a ho thung a. SP Team hi 3-2-in an chak.

2MAP Friendly Futsal Tournament-ah hian Commandant Team leh Medical Officer Team te'n champion inchuhin final an khel a. Commandant Team chuan 4-2-a hnehna changin, champion nomawi an la a. Tournament-ah hian C/199 C. Laldinpuia chu Best Player niin, Naik H. Lalnunhlima chu Best Goalkeeper a ni a, C/414 Benjamin MS Tluanga Ralte chu Top Scorer a ni.

Adjutant Team leh Administrative Inspector Team te'n pathumna an inchuh a. Hun pangngaia 2-2-a an inhneh tawk hnuah Administrative Inspector Team chuan penalty shootout hmanga hnehna changin, pathumna an ni.