No.1033/2020-2020

Covid -19 hrileng avanga inkharkhip kalpui mek laiin kuthnathawktute mamawh leh an dinhmun zirchiang tur leh Agriculture Department hmalaknate puangzar leh zirtir turin Mizoram Agriculture Development Board member-te chu team hnih (2) ah inthenin Mizoram District–te an tlawh chhuak mek a. Agriculture Development Board Team 1 members Pu Lalropuia Pachuau leh Pu Lalsangliana Hnamte te chuan nimin khan Hnahthial District an tlawh hnuah vawiin chawhma khan Lunglei DC Conference Hall-ah meeting an nei a ni. He meeting-ah hian Agriculture Department hnathawktute leh official dangte, kuthnathawktute, tlawmngai pawlte leh media mi te an tel a ni.

Vawiin meeting Lunglei SDO (S) Pu M.Misael kaihhruaiah Mizoram Agriculture Development Board member Pu Lalropuia Pachuau chuan Covid-19 hrileng avangin khawvel pumah industry tam tak an chawl thup a, mi tam tak eizawnna a tawp a, khawvel economy pawh a tlahniam mek zel a ni tiin ei leh bar kawnga harsatna thleng thei turte laka lo invenglawk turin Mizoram sawrkar chuan theihtawp a chhuah mek zel a ni, a ti a. Farmer’s Helpline number (0389- 2311160 and 0389 232856) siam niin heng number-te hi zing dar 10 atanga chawhnu dar 2 thleng biak pawh reng theih an nih thu kuthnathawktute chu a hrilh a. Farmers Helpline a thu thlen te hi Agriculture Minister Pu C.Lalrinsanga hova chinfel thin a nih thu tarlangin kuthnathawktute chu an harsatna te Agriculture Department hnenah thlen vat thin turin a chah a ni. Kuthnathawktute mamawh lei tih thatna, hlo tur, link road leh tuikhuah te ruahman turin kum dang aia nasa in Department-in hma a lak mek thu kalkhawmte a hrilh bawk.

He hunah hian Lunglei DAO Pu Tlawngtimawia Zote chuan report pe in Lunglei District huamchhunga Agriculture Department hmalaknate leh kuthnathawktute mamawh a tarlang a. Lunglei District huamchhungah thingtlang lo vah (jhumming cultivation) kalpui mek chhungkaw 9436 awmin hengte hian ram 5962 hectare a zau ah lo an nei mek a. Covid 19 hrilen hnuah Hectare 141.3 chulrih niin he hrileng avanga harsatna kan tawh mek lai hian kan pi leh pu te hun lai atanga kan chin thin kawlbahra, bal leh pangbal te ching uar tura hmalak mek a nih thu a tarlang a. Lunglei District chu Mizoram pumah thlasik buh (Winter paddy) tharchhuak awm chhun niin khaw paruk (6) ah kalpui mek a ni a. SEDP-Maize hnuaiah khaw 18-ah Cluster 19 ruahman niin ram zau zawng hi a zavaiin Acre 475 a ni a, kuthnathawktute mi 619 an tel mek a ni. Tin, nikum (2019-2020) khan Lunglei District Agriculture Department hian Brush cutter 17, Tractor (Custom Hiring Centre) paruk (6), Power tiller 10 leh sugarcane crusher paruk (6) kuthnathawktute hnenah an pe chhuak a ni.

Meeting-ah hian Agriculture Department hmalakna leh hmachhawpte zau taka sawiho niin zawhna leh chhanna hun te hman a ni a, kuthnathawktute pawhin an mamawhte an thlen a ni.

Agriculture Development Board member-te hian YMA duty te mamawh leina tur sum fai YMA Sub Hqrs President Pu Lalrotluanga hnenah an hlan bawk a ni.

Agriculture Development Board member-te hian vawiin vek hian Lawngtlai an pan anga. Lawngtlai leh Siaha an tlawh hnuah Chawngte leh Tlabung an tlawh leh dawn a ni.