1119/2024-2025

2024 Vawkhniahzawn thla ni 9: Vawiin khan Saikuti Hall, Lungleiah Lunglei Auto Rickshaw Owners' Association member-te pualin traffic dan leh natna inkai chhawn theih loh chi chungchang inzirtirna, 'Awareness Campaign on Traffic Rules & Non-Communicable Diseases (NCD)' hun hman a ni a. Lunglei Municipal Council (LMC) Vice Chairman Pu K. Lalrinawma chuan a hmanpui.

LMC Vice Chairman Pu K. Lalrinawma chuan awareness campaign buatsaihtu Healthy Lunglei District chungah lawm thu sawiin, kal khawmte chu programme chhawr ṭangkai turin duhsakna a hlan a. Lungleia lirthei tam ber chu auto rickshaw a nih angin rickshaw khalhtute an smart chuan Lunglei traffic chu a smart tur thu sawiin, lirthei khalhtute chu Lunglei khawpuiin traffic lama hma a sawn zel theih nan thuneitute nen thawh hona ṭha tak kalpui zel turin a chah a. LMC-in faina leh thianghlimna a ngai pawimawh tih sawiin, auto rickshaw stand te'n faina leh thianghlimna an ngaih pawimawh avanga a chhuan thu a sawi a. Faina ngaih pawimawhna chu vawng nung zel tura chahin, LMC-in stand te tan inelna pawh a buatsaih tur thu a sawi a. Kal khawmte chu mahni eizawnna ngai pawimawh tura chahin, nungchang mawi pu tur leh ruihhlo laka fihlim a, an hriselna te vawng uluk turin a fuih bawk.

Awareness campaign hi Lunglei Auto Rickshaw Owners Association President Pu Lawmhmingthanga'n a kaihruai a. Pu James Miahlung, Additional Deputy Commissioner & Chairman Sub-Committee On NCD Awareness Campaign & Screening Drive, Lunglei pawhin thu sawiin, DTO leh Traffic lam te nen Auto Rickshaw Owners Association te puala NCD leh traffic chungchang inhrilhhriatna neih ni se tih rel a nih angin he hun hi buatsaih a ni tih a sawi a. Mizoram hi ruihhlovin min run mek a, ṭhalai tam takin nunna an chan bakah, sum leh pai sen a tam a, hemi a nih vang hian natna laka inven hi a pawimawh hle a ni tiin, ei leh in chungchangah pawh fimkhur a ṭul thu a sawi a. Traffic Rules te zawm a, an hriselna dinhmun endik ṭheuh turin lirthei khalhtu kal khawmte chu a chah bawk a ni.

Vawiin hun hmannaah hian Pu Beitlotha Nohro, District Transport Officer chuan inlawmna thu a sawi a. Dr Vanlallawma Khiangte, MD, Civil Hospital, Lungleiin NCD chungchang zirtirna pein, Pu Lalṭhabuanga, Traffic incharge, Lunglei Police Station-in Traffic Rules chungchang zirtirna a pe bawk.

Vawiin awareness campaign-ah hian auto rickshaw neitu mi 250 chuang telin, Civil Hospital, Lungleia thawktute'n an hriselna dinhmun te an endiksak nghal bawk a ni.

Attachment

  • Loading attachment...