716/2025-2026

Lunglei, 2025 Nikir thla ni 3: Vawiin khan Lunglei District Bawrhsap Pi Navneet Mann hovin a hna thawh pindanah tun hnaia ruah sur nasa avanga Lunglei District chhung hmun hrang hranga chhiatna leh harsatna thlengte thlir ho niin, harsatna hrang hrang chin fel dan tur leh chhiatna lian zawk a thlen zel loh nana hma lak dan turte sawi ho a ni.

He hunah hian Additional Deputy Commissioner pahnih bakah, chhiatna thlen thulha hma lakna tur bial ṭhen viltu zonal officer-te, Additional SP, DIPRO leh DM&R DO te an tel a. Zonal officer-te'n an bial chan ṭheuh huam chhunga chhiatna leh harsatna thlen dan leh hma lak chin report an pe a. Additional SP chuan lirthei tlan dan ruahmanna leh ven himna chungchanga police lam hma lakna report a pe bawk a. Bawrhsap chuan ruah a la sur reng avangin lei min duhna laite chu uluk taka thlithlai reng tur leh, chhiatna thlengin a nghawng leh a tuartute chhawmdawlna lam chu ngai pawimawh a, hma la zung zung turin zonal officer-te chu a chah a ni.

He hunah hian mipui nunphung tikhaihlak thei leh mihring himna tiderthawng thei hmun ṭhenkhat ngaihven zual ngai lai biktea hma lak zui dan tur sawi ho ni bawkin, thuneitu sang zawkte leh mi thiamte nen inrawn tlanga hma lak zui rel a ni a. Police lamin vawiin aṭangin Theiriat kawng chung kawng tlabal chu lirthei tlan phal lohva an khar thu leh DC thupek angin NH-54 kawngpui Ṭawipui North-II daia lirthei chetsual tamna hmuna hma lakna hmasa atana tar tur 'fimkhur tura inhriattirna' (road signage) chu Police lamin an ruahman peih tawh thu leh vawiin lama tar fel tum a nih thu tar lan a ni bawk.

May ni 30, 2025 aṭanga thlipui leh ruahpui thawk chuan Lunglei District chhung hmun hrang hrangah chhiatna thlen belh zelin, vawiin, June ni 3, 2025 (Thawhlehni) chawhma dar 10:00 thleng khan Lunglei District Emergency Operation Centre (DEOC)/District Disaster Management Authority (DDMA) chuan chhiatna thleng report hrang hrang 108 a dawng tawh a. Lei min vanga chhiatna hmun 80 chuangah thlengin, thli vanga chhiatna hmun 10 chuangah leh tui lian vanga harsatna hmun 10 chuangah a thleng a. He'ng chhiatna hrang hrangah hian mimal in leh lo leh huan thlai chhia eng emaw zat awmin, thlanmual min, vantlang leh kohhran bungrua leh hmunhma chhia, kawng leh lei (bridge) chhia eng emaw zat a awm bawk a. Lei min, lung tla leh chirh tawlh nasa avanga khaw kar leh khaw chhung inkal pawhna ping eng emaw zat awmin, he'ngte hi a theih ang angin then fai hna thawh nghal zel a ni a. Lei min, tui lian leh thli vanga an chenna in dinhmun hlauhawma a din avangin hriat theih chinah chhungkaw 125 chu hmun him zawkah an inthiar chhuak tawh bawk a. He'ng chhiatna avang hian mihring thi leh hliam erawh an awm hriat a ni lo.