3911/2024-2025
Lunglei, 2025 Pawlkut thla ni 22: "District khat, thar chhuah chi khat" (One District One Product) tih hma lakna hnuaia Lunglei District-in thei a thar chhuah tura thlan, "balhla" thar chhuah leh sawngbawl chungchanga hma lak dan tur sawi hovin vawiin khan Lunglei DC Conference Hall-ah District Bawrhsap Pi Navneet Mann hovin ṭhut khawm a ni.
He hunah hian DC office bakah, line department hrang hrang - Horticulture, Agriculture, Industries, Cooperation, DRDO, ITI, SIRD, NIC leh I&PR ai awhte leh balhla hmanga sum chang thil siam chhuaktu (entrepreneur) pathum an tel a. He'ng entrepreneur pathum - Pi Vanlalzami Ralte (Bawbawihi Food Processing), Pu Pc. Lalngaihsanga (Pachuau Banana Chips) leh Pu F. Ramfangzauva (Rafa Pro Biotics Juice) te hian balhla leh thei dang hmanga kamram (chips), chhangphut (flour) leh um tui (juice) an siam chhuahte pho chhuakin, an hma lak dan an sawi fiah a. Bawrhsap Pi Navneet Mann chuan an hma lakna chhuanawm a tih thu sawiin, lawmpuina leh duhsakna a hlan a, an hma lakna chu chhunzawm zel turin a chah a ni.
He hunah hian ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktu tam zawk an awm theihna tur te, a hmanrua, a hralhna leh thil pawimawh hrang hrang ngaihtuah dan tur te sawi ho a ni.
Lunglei District thar chhuah balhla leh balhla aṭanga thil siam chhuahte vawrh lar a nih theih nan internet leh media hrang hrang kal tlanga pho chhuah ṭhin ni se tih niin, sawrkar leh pawl hun hmanna hrang hrangah tualchhung thar chhuah ngaihhlut leh hman tam ni se, tih a ni a. Balhla hmanga thil siamtu tam zawk an awm theih nan a tui mite a theih ang anga hma lakpui bakah, training leh workshop buatsaih te rel a ni.
Attachment
- Loading attachment...
