853/2025-2026

Lunglei, 2025 Nikir thla ni 12: Vawiin khan Lunglei District Water & Sanitation Mission (DWSM) Chairman, District Bawrhsap Pi Navneet Mann hovin Lunglei DC Conference Hall-ah Jal Jeevan Mission (JJM) leh Swachh Bharat Mission-Grameen (SBM-G) hnuaia hma lakna kal mek leh hmachhawpte thlir hovin line department hrang hrang hotute an ṭhu khawm.

He hunah hian Lunglei DWSM Member Secretary, PHED Lunglei Rural WATSAN Division-a Sr Executive Engineer Er ZR Ṭhasangzuala chuan JJM leh SBM-G hnuaia hma lakna hrang hrang report a tar lang a. JJM hnuaiah Lunglei District-ah water supply scheme 150 awmin, thawh zawh vek tawh a ni a. JJM hnuaia Lunglei District-a thingtlang khaw 101 awmah in tinah tui connection pek vek tawh niin, Har Ghar Jal (HGJ) village an ni vek tawh a. Lunglei District chhunga sikul 359-ah leh anganwadi centre (AWC) 238-ah JJM kal tlangin tui herh haw mai theihna, tap water connection pek tawh niin, UDISE+ leh Poshan Tracker portal-ahte connection pek zat data dik hi tar lang turin hma lak ni se, tih a ni.

He hunah hian tui thianghlim dan endikna hmun, Lunglei District Laboratory, Ramzotlanga mi chu January ni 14, 2025 khan India rama thuneitu sang, NABL (National Accreditation Board for Testing and Calibration Laboratories)-in a rin tlak tih a pawmpuina (accreditation) hmuh a nih thu tar lan a ni a. Khaw hrang hranga tui lakte a thianghlim leh thianghlim loh kum tin ṭum 2/3 endik ṭhin a nih thu tar lan niin, nikum lama Lunglei District-a khaw pariatin natna hrik leh damdawi hlauhawm chungchanga an khaw tui lak an endiktir chu bawlhhlawhna leh hlauhawm a awm lo tih finfiah a nih thu tar lan a ni a. Lunglei District-a HGJ khaw tinah anmahnia tui thianghlim dan an lo endik theihna tur, field test kit (FTK) pek a nih tawh thu leh khaw tinah FTK hman dan thiam hmeichhia (FTK trained woman) an awm vek thu tar lan a ni bawk.

SBM-G hnuaiah Lunglei District-ah bawlhhlawh dah ṭawihna khur (compost pit) 392, tuichhe paihna khur (soak pit) 450 leh vantlang inthiarna in (community sanitary complex) 21 siam/sak zawh a nih tawh thu tar lan a ni a. Lunglei District chu September 2018 khan inthiarna mumal nei lo awm tawh lohna (open defecation free - ODF) district-a puan a nih tawh thu leh Lunglei District-a khaw 99 chu inthiarna ṭha bakah bawlhhlawh thehthang dan felfai tak kalpuina ODF Plus khuaah puan a nih leh tawh thu tar lan a ni a. SBM-G hnuaiah hian kum 2024-2025 chhungin mimal inthiarna in (individual household latrine - IHHL) 300 sak zawh a nih thu leh kum 2025-2026 chhungin IHHL 200 sa leh tura ruahman a nih thu tar lan a ni bawk a. Lungsen RD Block chu block dawm kan ngai bik, aspirational block a nih angin kumina hma lakna tur atan hian ngaih pawimawh hmasak tum ni se, tih a ni.