401/2026-2027

Lunglei, 2026 Ṭomir thla ni 6: Vawiin khan Lunglei District Bawrhsap Pi Navneet Mann hovin a hna thawh pindanah Lunglei Deputy Commissioner (Bawrhsap) hma laknaa Lunglei District leh Lungsen Aspirational Block-a zirna tihhmasawnna tura hma lakna hrang hrang kalpui mekte thlir ho niin, hma lak zel dan tur sawi ho a ni.

He hunah hian kum hmasa lama District Administration leh Education Department ṭang kawpa hma lakna hrang hrang thlir let niin, kumin pawh hian hma lak chhunzawm leh ni se tih a ni a. "Be DC for a Day" tih hnuaia zirlai naupangte'n ni khat atan DC dinhmun an luah chhinna chu May thla chhung hian kalpui leh tum niin, zirlai naupang 10 thlan chhuahte pualin he hun hi hman tura ruahman a ni.

Kum 2025–2026-a DISHA Foundation nen ṭang kawpa Lungsen Aspirational Block huam chhung school 10-a hlawhtling taka English hriat thiamna leh zirna online-a training, ELF Programme kalpui tawh chu kumin hian kalpui chhunzawm tum niin, school 15 – Lungsen Block aṭangin school 10, Lunglei Municipal Council (LMC) huam chhunga school 3, Bunghmun Block aṭangin school 1 leh Tlabung Block aṭangin school 1 thlan tura ruahman a ni. 

Back-to-School Programme hnuaia school naupang eng emaw harsatna avanga school kal zawm ta lo (drop out)-te zawn chhuah a, school an kal zawm leh theih hram dan zawnpui bakah, mipuiin zirna bansan an awm leh awm loh an report zung zung theih nana QR Code siam chu kalpui chhunzawm ni se, school headmaster-te kal tlangin a theih ang anga school-a hruai let leh tura hma lak leh ni se tih a ni. 

Book-Nest Initiative hnuaia kum liam taa Lungsen Aspirational Block puala Lunglei khawpui chhunga lehkhabu khawn khawm a, school hrang hranga sem chu a hlawhtlin thu leh school naupangte'n an ṭangkaipui thu ngaihthlak a ni a. Kumin hian kalpui chhunzawm leh ni se, nodal department-ah UD&PA ni se, tih niin, June thla aṭanga hma la ṭan tura ruahman a ni.

Lunglei District-a Cosmic Classroom pathum (Lunglei, Lungsen leh Tlabunga awmte) chu hawn hun bi siamin, school naupang tam thei ang berin an tlawh theih nana hma lak chhunzawm ni se, tih a ni a. Project Period Pride hnuaia tleirawlte'n hmeichhe thla bi thi neih chungchang zahpui lo va, thil pangngai a nihzia leh hemi chungchang an hriat chian lehzualna tura school hrang hranga naupangte tana hma lakna chu June thla ral hmain school thlan chhuah pathumah hun buatsaih leh ni se, tih a ni a. Moneywise hnuaia zirlai naupangte'n sum leh pai ṭangkai leh dik taka an hman thiam theih nana financial literacy lama hma lakna chu June thla ral hmain school thlan chhuah pathumah kalpui leh ni leh se, tih a ni bawk. 

Hei bakah hian school thlan bikte pualin kuminah "40 Days Campaign" kalpui thar tura ruahman niin, hei hi school naupangte'n hriselna chungchangah te, chaw ṭha ei chungchangah te, naupang himna lamah te leh zirna kaihhnawih dangah te hawi lam dik an neih theih nana hma lakna tura duan a ni a. SOP hi tun thla chhunga peih fel hman tura beisei niin, school 1st term exam zawh lama hma lak ṭan tum a ni.