851/2025-2026

Lunglei, 2025 Nikir thla ni 12: 'District khat, thar chhuah chi khat' (One District One Product) hnuaia Lunglei District ODOP thei, 'balhla' thar chhuah leh sawngbawl chungchanga Lunglei District-a hma lakna kal mek thlir ho leh hma lak zel dan tur sawi hovin line department hrang hrang ai awhte chu vawiin khan Lunglei District Bawrhsap Pi Navneet Mann hovin a hna thawh pindanah an ṭhu khawm.

He hunah hian DC office bakah, line department hrang hrang - Horticulture, Agriculture, Commerce & Industries, DRDO, I&PR, NIC, KVK leh MOVCD-NER Phase-IV Team (Yashowati Bio-Multitechs) ai awhte an tel a. Meeting hmasa thu rel bawhzui dan leh hma lakna hrang hrang report ngaihthlak niin, ODOP hnuaia Lunglei District chhunga balhla thar chhuah leh balhla aṭanga thil siam chhuah tipung tur te, balhla chingtu leh balhla hmanga thil siam chhuaktu tam zawk an awm theihna tur te, hmanraw mamawh bunna tur leh a hralhna chungchanga hma lak dan tur rawtna hrang hrangte sawi ho a ni.

Lunglei District ODOP balhla vawrh lar a nih theih nan NIC enkawl Lunglei District website-ah ODOP page (https://lunglei.nic.in/odop/) siam niin, ODOP balhla chungchang leh a kaihhnawiha hma lakna hrang hrang pawh dah luh ṭhin a ni a. Sawrkar leh pawl hun hmanna hrang hrang leh khual ṭhate thilpekah ODOP balhla hmang uar tura ngenna chu DC office aṭangin office hrang hrangah thawn chhuah niin, hman chhoh mek a ni a. Lunglei District-a balhla hmanga sum chang thil siam chhuaktu (entrepreneur) pathum - Bawbawihi Food Processing, Pachuau Banana Chips leh Rafa Pro Biotics Juice te'n ODOP logo chuanna branding leh QR code an hman vek theih nan a ṭul anga hma lak mek niin, Udyam registration ti tur leh Gem portal-a inziak lut turin hma lak ni se, tih a ni.

Lunglei District-a balhla hmanga thil siamtu tam zawk an awm theih nan Horticulture Department chuan a tui awm mi 10 vel an zawn chhuah belh tawh a. He'ng mite tan hian Horticulture, Krishi Vigyan Kendra (KVK) leh Commerce & Industries te nen June thla chhungin training buatsaih ni se, tih a ni a. Balhla chingtu leh balhla hmanga thil siam chhuaktute tana training ṭha zawk buatsaih theih dan tur te, bul ṭan nana PMEGP, PMFME leh loan pung tlem dang an lak theih dan tur te, an hmanraw mamawh ngaihtuahpui dan tur leh an thil siam chhuahte tihlarna leh hralh chhuahna kawnga hmasawn theih dan tur rawtna hrang hrangte sawi ho a ni bawk.