3413/2024-2025
2024 Pawltlak thla ni 6: Vawiin khan Lungleia kum 2024 Krismas leh 2025 Kumthar vuakveta boruak muanawm tak a awm theih nana hma lak dan tur hrang hrang ngaihtuahin sawrkar official-te leh pawl hrang hrang ai awhte chu Lunglei District Bawrhsap Pi Navneet Mann hovin a office chamber-ah an ṭhu khawm.
He hunah hian boruak muanawm tak hnuaia Krismas leh Kumthar hman a nih theih nana October ni 21, 2024-a Bawrhsap hova ruahmanna lo siam tawh bawhzui dan te thlir ho a ni a. Superintendent of Police Pu J. Lalmuankima leh Sub-Headquarters YMA President Pu K. Lalfakzuala te bakah, Excise & Narcotics Department, Traffic Police leh VDP Coordination Committee aṭang te'n an hma lak dan report ngaihthlak a ni a. Hma lak zui dan tur hrang hrang sawi ho a ni bawk.
He hunah hian Lunglei District-ah hunpui vuakvetah halpuah, halmawi, sky lantern leh silai lem (plastic mu kap chhuak thei chi) khapna kenkawh mek a nih thu tar lan niin, zuar an awm leh awm loh endikin District Police te ṭum 36 an chet chhuah tawh thu leh online-a thil chahnaah pawh chah an awm loh nan Lungleia thawn lo tura ngenna thlen a nih thu tar lan a ni a. Hunpui denchhena police patrolling leh YMA/VDP duty post siam pawh tih theih thuai tum a nih thu te, excise leh traffic lam pawh ngawrh taka an duty chhoh mek thu te, tun hnaiah zan reia bike-a tlan bengchheng ṭhin, exhaust pipe siam danglam vuah 38 man a nih thu te, No Tolerance Week kalpui leh No Vehicle Zone puan te pawh tum a nih thu te tar lan a ni bawk.
Krismas leh Kumthar vuakvetah hian Lunglei District chhungah ruihtheihthil leh puak thei lam chi hman leh hal khap niin, khauh taka kenkawh tum a ni a. Sualna hrang hrang do tur leh boruak muanawm tak a awm theih nan police leh tlawmngai pawlte chu ralvengin an awm dawn a, dan bawhchhia an awm chuan dan anga hrem zel an ni dawn a. Hunpui laia boruak muanawm a awm theih nana ruahmanna hrang hrangte ṭha taka zawm a, thuneitute thawhpui turin District thuneitute chuan Lunglei District mipuite an ngen a ni.
Attachment
- Loading attachment...
