1577/2024-2025

2024 Thlazing ni 14: Nimin chawhnu khan Bunghmun West Village Council By-Election neih tur atana final electoral roll chu Lunglei District Election Officer Pu R. Lalṭhazuala chuan Lunglei DC Conference Hall-ah a tlangzarh.

Lunglei DEO Pu R. Lalṭhazuala chuan Bunghmun West VC by-election atana electoral roll ennawnna felfai tak neih a nih hnuah a hun taka final electoral roll tlangzarh theih a ni chu lawmawm a tih thu sawiin, final electoral roll buatsaihnaa tha thawhtu - election official, tlawmngai pawl, political party hrang hrang leh Bunghmun West mipuite chungah lawm thu a sawi a. India ram chu inthlang ram a nih angin India Danpuiin khua leh tuite vote thlak a ngai pawimawh hle tih sawiin, inthlan hmachhawn turah ko kim zawka mipuiin vote an thlak theih nana hma la turin official-te, political party leh tlawmngai pawl ai awhte chu a chah a. Inthlanna felfai leh thianghlim a awm theih nan tlawmngai pawl leh political party te chuan ṭha taka official-te ṭawiawm turin a sawm bawk a ni.

Electoral roll tlangzarhna hun hi Assistant District Election Officer Pu James Miahlung chuan a kaihruai a. Pu James Miahlung bakah, Electoral Registration Officer Pi Rochuangkimi Khenglawt leh Assistant Electoral Registration Officer Pi ST Lalvensangi te'n political party ai awhte hnenah final electoral roll copy hi an hlan nghal a ni.

Bunghmun West VC hnuaiah hian Bunghmun khua leh Tleu khua te awmin, nimina tlangzarh tak final electoral roll aṭanga a lan danin, tun dinhmunah Bunghmunah vote nei mipa 339 leh hmeichhia 348, an vaiin vote nei mi 687 an awm a. Tleuah vote nei mipa 47 leh hmeichhia 41, an vaiin vote nei mi 88 an awm thung a. Draft electoral roll aṭangin Bunghmunah vote nei mi 29 (mipa 13 leh hmeichhia 16)-in an pung a; Tleuah erawh draft leh final electoral roll-ah danglamna a awm lo thung.