4245/2024-2025

Lunglei, 2025 Ramtuk thla ni 14: Vawiin khan Lungleia Chapchar Kut 2025 hman dan tur relin Lunglei District Bawrhsap Pi Navneet Mann hovin Lunglei DC Conference Hall-ah ṭhut khawm buatsaih a ni.

He ṭhut khawmah hian Lungleia sawrkar department hrang hrang official-te; Lunglei Sub-Headquarters Young Mizo Association (YMA), Mizo Hmeichhe Insuihkhawm Pawl (MHIP), Mizo Cultural Organisation (MCO) leh Mizo Cultural Artistes' Association (MCAA) te; Lunglei Headquarters Mizo Upa Pawl (MUP) leh Mizo Zaimi Inzawmkhawm (MZI) te leh Lunglei District Headquarters Music Domain Mizoram (MDM) ai awhte an tel a. Chapchar Kut 2025 hmanna tura thil ṭul hrang hrangte sawi ho niin, hlung taka hman a nih theih nan ruahmanna siam a ni a. Chapchar Kut hmanna tur thil ṭul hrang hrang lo bawhzui turin Additional Deputy Commissioner chairman-na leh Sub-Headquarters YMA President co-chairman-na hnuaiah Organising Committee din a ni a. Organising Committee ṭhut khawm hun atan February ni 17, 2025 ruat nghal a ni bawk. 

Kumin Chapchar Kut hi "Zo nun ze mawi - Hawihhawmna" tih thupui hmangin March ni 7, 2025 (Zirtawpni) hian Lungleia C. Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Kut Nu atan Health & Family Welfare Minister Pi Lalrinpuii beisei a ni a. Hun hman dan tur chipchiar leh ruahmanna dang chu Organising Committee kutah dah a ni.

Chapchar Kut ni hian hnam lam chi hrang hrang thlir tur leh zaithiamte zai ngaihthlak tur a awm dawn a. Hnam ziarang tar lang leh chawi lar tur zawnga hun hman leh tum niin, sawrkar department, pawl leh mimal te tan an hma lakna pho chhuahna leh thil zawrhna tur bekte (stall) zar tum a ni bawk a. Hlung taka Kut hman a nih theih nan pawl leh kohhran hrangte chu hemi ni hian programme dang siam lo tura ngen ni se, tih a ni.