173/2026-2027

Lunglei, 2026 Ṭau thla ni 16: Vawiin khan Lunglei District Chapchar Kut 2026 Organising Committee chu an Chairman, Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm a. March ni 13, 2026 (Zirtawpni)-a Lungleia C. Ṭhuamluaia Muala Chapchar Kut hman dan an thlir let.

Chairman Pi Zoramdini chuan Lungleiah Chapchar Kut 2026 hlawhtling leh hlung taka hman a ni chu lawmawm a tih thu a sawi a. Organising Committee member-te inpekna leh ṭan rualna te, mawhphurhna hrang hrang neite ṭhahnem ngaihna leh inpekna leh District mipuite phurpuina leh ṭawiawmna vang a nih thu sawiin, lawm thu a sawi.

He hunah hian Organising Committee Secretary Pu Zothanzuala Hnamte chuan Chapchar Kut inbuatsaihna kalpui dan leh Kut hman dan report tlangpui tar langin, sawrkar department hrang hrangte, Lunglei Municipal Council (LMC), YMA, MHIP, MUP, MCO, MCAA, MJA, LPA, Clean Lunglei leh mawhphurhna leh chanvo hrang hrang neite inpekna leh thawh hona ṭha tak avangin lawm thu a sawi a. Finance Manager, Sub-Divisional Officer (Sadar) Pi TT Beikhaizi chuan sum hman dan leh sum dinhmun report a pe bawk.

He hunah hian member-te'n Chapchar Kut hman dan thlir letin, Chapchar Kut hlung taka hman a ni chu lawmawm an tih thu an sawi a. Chapchar Kut hmannaa thil chhinchhiah tlak leh zawngchhang chi te, hmasawn ngaihna laite tar langin, kum danga hlawhtling leh hlung taka Chapchar Kut hman a nih zel theih nana rawtna leh duhthusam an neih hrang hrangte an sawi ho.