4256/2025-2026

Lunglei, 2026 Ramtuk thla ni 2: Vawiin khan Lunglei District Chapchar Kut 2026 Organising Committee chu an Chairman, Additional Deputy Commissioner Pi Zoramdini hovin Lunglei DC Conference Hall-ah an ṭhu khawm a. Chapchar Kut huaihawt tura thil pawimawh hrang hrang an sawi ho.

He hunah hian Additional Deputy Commissioner Pi Rochuangkimi Khenglawt, Organising Committee puipa (office bearer)-te leh Organising Committee member — department hrang hrang official-te, Young Mizo Association (YMA) Sub-Headquarters, Mizo Hmeichhe Insuihkhawm Pawl (MHIP) Sub-Headquarters, Mizo Cultural Organisation (MCO) General Headquarters, Mizo Cultural Artistes' Association (MCAA) Sub-Headquarters, Mizoram Journalists' Association (MJA) District Headquarters, Mizo Zaimi Inzawmkhawm (MZI) Lunglei Headquarters, Music Domain Mizoram (MDM) District Headquarters leh Lunglei Photographers Association (LPA) ai awhte an tel a. Additional DC Pi Rochuangkimi Khenglawt chuan hawnna thu sawiin, Chapchar Kut hlung taka hman a nih theih nan zau taka ngaihtuahna seng turin member kal khawmte a sawm a. Organising Secretary, Sub-Headquarters YMA Secretary Pu Zothanzuala Hnamte hnen aṭangin kum hmasa lama Chapchar Kut hman dan report ngaihthlak niin, Kut huaihawtna atana thil pawimawh hrang hrang sawi ho nghal a ni.

Kumin Chapchar Kut hi "Zo nun ze mawi — Inremna" tih thupui hmangin March ni 13, 2026 (Zirtawpni) chawhma dar 10:30 aṭangin Lungleia C. Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Kut Pa atan Lunglei High Powered Committee (HPC) Vice Chairman Pu V. Malsawmtluanga chu beisei leh sawm ni se, tih a ni a. Chapchar Kut nia hnam lam chi hrang hrang entir tur leh a lam tur te, zaithiam sawm tur leh chanvo hrang hrang nei tur te, ei in leh thuam thil hrang hrang zawrhna bekte (stall) ruahman dan tur te leh thil pawimawh dangte sawi ho a ni a. Ṭhut khawm leh hun atan February ni 9, 2026 (Thawhṭanni) ruat nghal a ni.