4442/2025-2026

Lunglei, 2026 Ramtuk thla ni 12: Vawiin khan Lunglei District Chapchar Kut 2026 Organising Committee chu Sub-Divisional Officer (Sadar) Pi TT Beikhaizi hovin Lunglei DC Conference Hall-ah an ṭhu khawm.

He hunah hian Organising Committee puipa (office bearer)-te bakah, member department hrang hrang official-te leh pawl hrang hrang ai awhte an tel a. Lungleia Chapchar Kut 2026 huaihawt tura inbuatsaihna kal mek thlir hovin, hun hman dan tur leh ruahmanna hrang hrang an duan bakah, chanvo hrang hranga mawhphurtute an inruat a. Organising Committee-in a lo rel tawh angin Lungleia Chapchar Kut lawmnaah hian hman khat daih sarang (single use plastic) hman loh hram tum ni se, tih chu ṭha taka kalpui bakah, a zau thei ang bera puanzar ni se, an ti.

Kumin Chapchar Kut hi "Zo nun ze mawi — Inremna" tih thupui hmangin March ni 13, 2026 (Zirtawpni) chawhma dar 10:30 aṭangin Lungleia C. Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Lunglei High Powered Committee (HPC) Vice Chairman Pu V. Malsawmtluanga chu Kut Pa a ni ang.

Lungleia Chapchar Kut lawmnaah hian hnam lam chi hrang hrang thlir tur leh zaithiam tak takte zai ngaihthlak tur a awm dawn bakah, hnam ziarang tar lang leh chawi lar thei tur chanvo dang chi hrang hrang ruahman a ni bawk a. Lunglei Photographers' Association (LPA) te huaihawtin Mizo thuam inbela Kut hmannaa kal nulate aṭangin "Kut Lanu" thlan tum niin, Mizoram Journalists' Association (MJA) Lunglei District huaihawtin Mizo thuam inbela Kut hmannaa kal naupangte aṭangin "Kut Hraite" (hmeichhia leh mipa) thlan leh tum a ni bawk a. Ei leh in, hnam thil leh kut themthiam thil bakah, Kut hmannaa kalte mamawh leh duh zawng hrang hrang lei theihna tur leh intihhlimna tur dawr (stall) hawn tum niin, department hrang hrangte leh kut hna thawktute thil thar chhuah leh deh chhuah te pho lan a ni dawn bawk a. Naupangte intihhlimna leh inawm tleina tur hmunhma te pawh siam tum a ni.