4640/2024-2025

Lunglei, 2025 Vau thla ni 13: Vawiin chawhma dar 11 khan Lunglei DC Conference Hall-ah Mizoram Sawrkar flagship programme, ‘Bana Kaih’ hnuaia mimal hmasawnna tur leh khawtlang tana ro tling khawl lam thil siam chhuah (hardware innovation) kawnga inelna, Chief Minister’s Inventors Challenge buatsaih a ni.

He hun hi Lunglei District Innovative Challenge Committee Chairman, District Bawrhsap Pi Navneet Mann chuan a kaihruai a. Inelna thianghlim buatsaih chu hmasawnna atana hmanraw pawimawh tak a nih thu sawiin, inelnaa telte duhsakna a hlan a. State level inelnaah lawmman la thei ngei tura inbuatsaih turin a chah nghal bawk.

He inelnaah hian mahni irawm chhuaka thil ngaihtuah chhuah thiamna (creativity & originality of idea/concept), hman ṭangkai theihna (practicality/technical feasibility), a pian hmang leh siam dan (design & execution), sumdawnna kawnga hman theih dan tur (business model & sustainability) leh vantlang nun a nghawng dan (societal impact value) te chu tehfungah hman niin, Lunglei District-a Zopa kut themthiamna hmanga khawl lam thil siam ṭhinte chu endiktute hmaah an inel a. Hmarcha chi lakna siamtu Pu Ramdinmawia, Haulawng chu pakhatnaa thlan niin, lawmman pawisa fai ₹ 25,000/- leh certificate a dawng a. Pahnihna Pu Chhuanmawia, Haulawng (puan tahna khawl - zoloom) chuan lawmman pawisa fai ₹ 15,000/- leh certificate dawngin, pathumna Pu JH Lalramzauva, Lunglawn (leirawhchan siamna khawl - brick moulding machine) chuan lawmman pawisa fai ₹ 10,000/- leh certificate a dawng bawk a. Pakhatna aṭanga pathumna thleng hian March ni 25 - 27, 2025 chhunga Aizawla state level intihsiakna buatsaih turah Lunglei District ai an awh dawn a ni.

Lunglei District tana Open Category for Hardware Innovation inelna hi Pu Lalremruata (Project Scientist, MISTIC), Pu Vanneihthanga (Scientific Officer, MISTIC), Pu Rosangkima (Principal, Govt ITI, Lunglei) leh Pu Beitlotha Nohro (DLAO, Lunglei) te'n an endik a ni.

Attachment

  • Loading attachment...