4049/2025-2026

Lunglei, 2026 Pawlkut thla ni 19: Vawiin khan Lunglei District chhunga hriselna dinhmun enfiahna leh inentirna [clinical establishment (CE)]-te dan anga chhinchhiah leh khuahkhirh tura din, District Registering Authority (DRA) chu Chairperson, Lunglei District Additional Deputy Commissioner Pi Rochuangkimi Khenglawt kaihruaiin a hna thawh pindanah a ṭum ruk nan an ṭhu khawm a. Convener, Lunglei District Senior Chief Medical Officer (SCMO) Dr Lalrinthangi bakah, Deputy CMO, DIPRO, Deputy SP (Hqrs), Lunglei Municipal Council (LMC) ai awh leh CEA District Level Coordinator te an tel.

Sawrkar laipui dan siam, The Clinical Establishments (Registration and Regulation) Act, 2010 beh chhanin Mizorama clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoramah hman a ni a. He dan hnuaiah hian damdawi in, clinic leh laboratory te chu DRA-ah an inziah luh (register) vek a, a him chin leh pawm theih chin (minimum standard) an phak ngei ngei a ṭul a. Chuti ang tur chuan Lunglei District-ah pawh hma lak chhoh mek a ni.

Lunglei District SCMO Office-in an chhinchhiah danin, tun dinhmunah Lunglei District chhungah sawrkar hriatpui clinical establishment 59 a awm mek a. Hemi zinga 15 chu sawrkar enkawl (District Hospital, Community Health Centre leh Primary Health Centre) niin, a dang 44 chu mimal din (private) damdawi in, clinic leh laboratory a ni thung a. Hospital 19, Clinic 21, Dental Clinic 12, Physiotherapy Clinic 2 leh Diagnostic Laboratory & Imaging Centre 5 a awm.

Vawiin ṭhut khawmah hian DRA ṭhut khawm hmasaka thu dahte bawhzui a nih dan leh December ni 3 – 5, 2025 chhunga Lungleia non-governmental clinical establishment-te endikna kalpui dan thlir ho niin, hma lak zui dan tur sawi ho a ni a. Damdawi in thli leh bawlhhlawh [bio-medical waste (BMW)] sawngbawl leh thehthang chungchangah him leh felfai zawka thehthang a nih theih nan clinical establishment-te'n Mizoram Pollution Control Board (MPCB) aṭanga phalna (BMW Authorisation) an neih a ngaih angin Authorisation dil mek leh la nei lote chu Authorisation nei thuai tura hma la tura hriattirna pek nawn ni se, tih a ni a. BMW thehthang leh sawngbawl chungchanga CE-te tana hriat tur pawimawh zirna training buatsaih dan kawng ngaihtuah ni se, tih a ni bawk.