3698/2022-2023

Lunglei the 27th February 2023:  Vawiin khan UD&PA Department buatsaihin Lunglei Convention Centre kawtzawlah 27th February, 2023 atanga 1st March, 2023 thleng a hman tur DAY-NULM Grand Festival cum Food Fest 2023 hawnna hun hman a ni a. Lunglei Bawrhsap Pi Ramdinliani, IAS chu khuallian niin a hmanpui.

DAY-NULM Grand Festival hawnna programme hi District Urban Development Officer Pi Vanthangpuii'n a kaihruai a, khuallian Pi Ramdinliani chuan  DAY-NULM chu Mizoramah 2015  atangin mumal takin kalpui a nih thu a sawi a. Central sawrkar in ngaihtuahna nasa tak seng a khawpuia awm te tan eizawnna ngelnghet zawk an neih theih nan a hmalakna a ni, a ti a. DAY-NULM Festival hi mahni kutchhuak leh thiamthilte phochhuah theihna hun tha tak a nih ngei a beisei  thu a sawi a. Mizote hi kan kut themthiamin kan mit a fing a, kan thil siam te mawi leh changkang tak a fun dan te ngaihtuah tel ila, District chhung mai nilo Mizoram pawn thleng a thawnchhuak thei turin rilru siam in hma la ila kan hlawhtling ngei ang, a ti a. Self Help Group kan neih te pawh hi member ten thawh hona tha leh inlungrualna bakah tum mumal tak kan neih chuan thil ropui leh lian tham zawk kan ti thei a ni, tiin kalkhawm te a fuih a ni.

Report a tarlan danin Lunglei District a UD&PA in DAY-NULM hnuaia hmalakna ah Self Help Group 172 din tawh niin kut themthiamna lam training chhuak 2821 awmah mi 1004 te hna hmuhsak  tawh an nih thu tarlan a ni a. DAY-NULM hnuaiah hian  mi 361 hnenah loan an pek tawh bakah Group Enterprise leh Self Help Group 60 hnenah an pe tawh bawk a, Shelter for Urban Homeless hnuaiah Home 12 tanpui tawh an ni.

Vawiin a DAY-NULM Grand Festival-ah hian stall 40 an in hawng a- handloom leh handicraft, thei chi hrang hrang, pangpar, cosmetics leh eitur hrang hrang zuarte an inpho chhuak a ni.