269/2025-2026

Lunglei, 2025 Ṭau thla ni 22: Vawiin khan District Institute of Education and Training (DIET), Lunglei huaihawtin Lunglei District leh Hnahthial District chhunga primary sikul zirtirtute tana an zirlaite hnena ziak leh chhiar leh chhiarkawp bulṭhut zirtir dan tur zir hona, "Training on foundational literacy and numeracy (FLN)" thawh khatna (Phase-1), ni thum (April 22 - 24) awh tur chu School Education Complex Conference Hall, Lungleiah ṭan a ni.

Training hawnna inkhawm hi DIET Lungleia Lecturer Pi C. Lalrinzuali'n a kaihruai a. DIET Lunglei Principal Pi Lalremruati Fanai leh Lunglei North Sub-Divisional Education Officer Pi Lalnunhlui te'n training buatsaih chhan leh trainee-te fuihna thu an sawi a. DIET Lungleia Lecturer & Course Coordinator Pu Vanzama'n lawm thu a sawi bawk.

Lunglei leh Hnahthial district-a primary sikul zirtirtute tana FLN training thawh khatnaah hian sikul 100 aṭangin zirtirtu pakhat ṭheuh koh an ni a. DIET Lungleia lecturer-te - Pu Vanzama, Pi C. Lalrempuii, Pu C. Lalmuanpuia, Pi C. Lalrinzuali leh Pi F. Lalhmangaihzuali te'n training hi an pe dawn a ni.