4617/2025-2026

Lunglei, 2026 Ramtuk thla ni 26: Vawiin khan Lunglei District Level Committee on Vibrant Village Programme–II (VVP–II) chu an Chairman, District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm.

District Bawrhsap chuan VVP–II chu district chhunga ramri hnaih khuate'n hmun laili zawka mite ang bawka kawng hrang hranga hmasawnna an hmuh theihna tura sawrkar laipui ruahmanna a nih thu sawiin, sawrkar scheme awm sate nena inhne rem leh ṭha taka kalpui a pawimawh thu a sawi a. Hna thawh tur ruahmante chu hlawhtling taka kalpui a nih theih nan theih tawp chhuah turin BDO-te leh line department-te a chah.

Member Secretary, Lunglei District Rural Development Office (DRDO) Project Director Pi Zoramdini chuan VVP–II-in a tum ber chu ramri hnaih khuate tihchangtlun leh tihchangkan a nih thu sawiin, hma lak dan tur a sawi zau va. Lunglei District-a VVP–II kalpuina tura Village Action Plan ruahman chu thlir ho niin, siam rem ngai siam rem a nih hnuah pawm a ni a. BDO-te leh line department aṭanga VVP–II kalpuina tur khuaa hna thawh tur rawtna (project proposal) lutte thlir ho niin, siam ṭhat ngaite chu a kaihhnawih BDO leh line department-te'n lo siam ṭhain, February ni 27, 2026 ral hmain DC-ah lo theh lut leh se, tih a ni.

VVP–II hnuaia hma lakna turah hian Lunglei District-ah chuan Tlabung Block-ah khaw 10 leh Bunghmun Block-ah khaw 2, a zavaiin khaw 12 thlan a ni a. Khaw tinah hian cheng vaibelchhe 3 zel hmasawnna hna thawhna tur ruahman a ni a. Hemi sum hmang hian khaw chhung mamawh hna hrang hrang thawk turin project eng emaw zat duan a ni.

Lunglei District-a VVP–II kalpuina tur khuate chu:

Tlabung Block chhungah–

(1) Hmundo

(2) Silkur

(3) Old Khojoysury

(4) Letisury

(5) Devasora

(6) Malsury

(7) Kalapani

(8) Lamthai

(9) Nunsury–I & II

(10) Bindasora

Bunghmun Block chhungah–

(1) Marpara South

(2) Mauzam