1462/2024-2025

2024 Thlazing ni 6: Vawiin khan Lunglei District Education Officer (DEO) office chamber-ah Mizoram Sawrkar Health & Family Welfare Department (H&FW) hnuaia National Tuberculosis Elimination Programme (NTEP), Lunglei District leh Education Department, Lunglei District te ṭang kawpin Lunglei District chhunga middle school (Class VI-VIII) zirlaite puala District Level Essay & Poster Painting Competition on TB Awareness an buatsaiha lawmman dawngtute hnena lawmman hlanna hun buatsaih a ni.

He hun hi Lungsen Sub-Divisional Education Officer (SDEO) Pu V. Zoremtluanga'n kaihruaiin, report a pe nghal a. Lunglei District Tuberculosis Officer (DTBO) Dr K. Lalhmachhuana'n TB (ngawr) natna chungchanga hriat tur pawimawh hrang hrang sawiin, TB chu a kaite khuh, hahchhiau leh chil per aṭanga boruak kal tlanga inkai chhawn theih a nih avangin fimkhur a ṭul thu te, hriat chhuah hma chuan inenkawl dam harsa lo tak a nih avangin mahni dinhmun inenfiah hma a ṭhat thu te, TB hrik pai leh pai loh enna leh a veite enkawlna chu sawrkarin a thlawn veka a ruahman thu te a sawi a. TB chu kum 2030-ah khawvel aṭanga um bo tura hma lak a nih laiin India ramah chuan, "TB Harega, Desh Jeetega" (TB a tlawm ang a, ramin hnehna a chang ang) tih thupui hmangin kum 2025-a um bo hman tura hma lak a nih thu leh Lunglei District-ah pawh khua/veng hrang hrangah thawktute'n TB kai endikna an kalpui mek thu te, TB um bo hna chu thawktute chauhvin an tihhlawhtlin theih a nih loh avangin mipui vantlang thawhpuina an mamawh thu te sawiin, TB um bo tura hma laknaah inzirtirna ṭha theh darh kawnga ṭan lakpui turin mipuite a sawm nghal a ni.

He hunah hian Lunglei DEO Pi K. Lalrintluangi chuan zirtirtute, zirlaite leh nu leh pate'n TB nihna hria a, an ngaihven theih nana NTEP lamin zirlaite tana inelna thianghlim an chhawp chhuak chu lawmawm a tih thu sawiin, ram leh hnam leh khawtlang nunah hriselna ngaih pawimawhna a zual zel nan rah ṭha a chhuah a beisei thu a sawi a. Zirnain a tum chu naupangtea Pathianin theihna a dah hai chhuah a nih thu sawiin, chumi hai chhuak tur chuan zirlaite pual inelna chi hrang hranga tel tam a pawimawh, a ti a. Zirtirtute chu an zirlaite'n an theihna an hai chhuah theihna kawng dapsak ṭhin tura chahin, tun ṭum inelnaa tel zirlaite leh anmahni kaihruaitu zirtirtute fakawm a tih thu leh a chhuan thu a sawi bawk.

Lunglei District Level Essay & Poster Painting Competition on TB Awareness 2024 atan hian kumin June thla tir khan district leh sub-divisional education office-te kal tlangin hriattirna chhuah niin, July ni 16, 2024 thleng khan mahni lem-thu ziak (essay-poster) theh luhna hun hawn a ni a. Zirna in paruk - Adventist English School, Bazarveng; Baptist English School, Serkawn; Baptist English School, Thingfal; Government Middle School, Zohnuai; Government Middle School-I, Lungsen leh Southern Flower School, Lunglei aṭangin zirlai naupang 11-in an lem-thu ziak an theh lut a ni.

Lunglei District Level Essay & Poster Painting Competition on TB Awareness 2024-a lawmman dawngtute chu he'ng mite hi an ni: