2257/2025-2026

Lunglei, 2025 Sahmulphah thla ni 17: Vawiin khan Mizoram Journalists' Association (MJA), Lunglei District huaihawtin National Press Day 2025 pualin Lunglei Press Club-ah hun hman a ni a. Lunglei District Superintendent of Police Pu J. Lalmuankima'n Khuallian niin a hmanpui.

Khuallian Pu J. Lalmuankima chuan thu thar theh darhtu (press mi)-te chu sawrkar inrelbawlnaa hmun pawimawh tak luahtu, fourth pillar an nih thu sawiin, press mite chu inchher hriam reng tur an nih thu leh upa deuh tawh emaw, la naupang deuh emaw tan pawh tun lai thiamna, Artificial Intelligence (AI) chungchang an hriat a, an hman thiam a ṭul thu a sawi a. Lunglei Police te'n AI chungchang zir theihna Training Centre an neih thu sawiin, India ram dan thar (New Criminal Law) te, hnu chhui dan te, tun lai thiamna hmanga thu thar lak khawm dan leh an mamawh thil hrang hrang an thiam theih nan Police lam nena zir ho theih dan ruahman tura an inhawn reng thu a sawi a. Police te hna thawh danah inthlahrung lova thurawn pe a, fin chhuah ṭhin tura chahin, investigative journalism lam te luh chilh tam a, journalist ṭha zawk ni thei tura intuai hriam zel turin MJA member-te a chah.

National Press Day puala hun hman hi District MJA Vice President Pu Lianchama Chhangte chuan a kaihruai a. District MJA President Pu H. Lalthansanga pawhin thu sawiin, dan leh thupek keng kawhtu police-te leh media mite chu inhne hnaia thawk ho reng tur an nih thu a sawi a. Journalist-te zalenna leh ethics tihnun zel nan Press Council of India chuan hma a la zel tih sawiin, journalist-te chu khawvel changkan dan mila intuai hriam zel tur an nih angin National Press Day hman aṭanga inbuatsaih thar turin member-te a sawm.

Vawiina MJA Lunglei te'n National Press Day puala hun an hmanah hian MJA member-te bakah, Lunglei District I&PR Office-a thawktute an tel a. Prominent Journalist thar Pu C. S. Chawngchhuma hnenah lawmpuina hlan a ni bawk.

Chawhnu lamah President Pu H. Lalthansanga kaihhruaiin thupui zir hona buatsaih a ni a. Treasurer Pu K. Lalrinpuia chuan press mite mawhphurhna chungchang, Mizo ṭawng dik leh aia upa zah leh mahni mawhphurhna hlen a ṭulzia a sawi a. Zonet JB News Editor Tv. K. Lalremruata chuan Online RTI chungchang zirtirin, a taka tih chhin nghal a ni bawk.

National Press Day hi November ni 16, 1966-a din, ram pum huapa media-te thlung khawmtu Press Council of India (PCI) din ni pualin kum tin hman ṭhin a ni a. Kum tin thupui neiin, media-te ṭhan chhoh zel dan tur leh hmasawnna tur te, ram rawngbawlna kawnga media-te'n hlawk zawka tha an thawh theih dan tur te zir ho nan hman ṭhin a ni a. Kuminah Pathiannia a tlak avangin vawiin khan a pual hian hun hman a ni.