3643/2023-2024

LUNGLEI: the 2nd January,2024: Vawiin chawhnu dar 2:00 khan District Bawrhsap leh Task Force Committee Chairman ni bawk Pi Ramdinliani, IAS kaihruaina hnuaiah “District Task Force Committee For Elimination Of Malaria” member ten meeting an nei.Vawin meeting-ah hian Lunglei District Vector Borne Disease Control Programme team ten Power point presentation hmangin Lunglei district chhunga Malaria hrik control tura an hmalak tawhna leh hmachhawp bakah an harsatna tawh hrang hrang te leh a sutkian dan tura ruahmanna an lo siam te pholan niin, vawiin meeting-ah hian hmalak dan tur hrang hrang rel ho nghal a ni.

Vawiin meeting-a LDVBDCP team ten report an pek danin, an hmalakna hian thingtlang khaw 193 a tuam a. Nikum chhung khan Lunglei district-ah mi 51058 thisen an test atangin, Malaria hrik pai +ve mi 4959( 3673-Pf leh 1286-Pv) hmuhchhuah an ni a, heng zinga mi 3 in nunna an chan a ni. Kum 2022 chhung khan Malaria +ve mi 2890 an awm a, nikum 2023 chhung khan Malaria +ve hi a let deuh thawhin an pung a ni. Malaria +ve te zingah hian Lunglei district khawthlang lam mi leh NHIDCL hnuaia NH54 leh NH302 kawng sial hnathawk labourer te an tam thu tarlan a ni. Lunglei District-ah nikum chhung khan Chikungunya +ve mi 43 leh Dengue +ve 179 an hmuchhuak bawk.

Lunglei District-ah hian Fur laia motor thlen theih lohna, Lawng(Boat)  chauhva kalpawh thei Thingtlang khaw 30 vel a awm a. District Bawrhsap hmalaknain Disaster Management & Rehabilitation   Dept. hnuai atangin mi 12 chuan theina Lawng siamtir mek a ni a, tunah peihfel thawhkhat  tawh a ni. Hei hi a tulna piangah Health Dept. pawhin an hman ve theih tur thu a tarlang bawk.