3687/2024-2025

Lunglei, 2025 Pawlkut thla ni 6: Vawiin chawhma khan Lunglei District Task Force for Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District chhunga naupang leh raipuarte hnena natna hri leng inkai chhawn theih laka invenna (vaccine) pek ṭhin (routine immunisation) kalpui chhunzawm dan tur an sawi ho.

Lunglei Bawrhsap Pi Navneet Mann chuan hriselna kawnga vaccine lak pawimawhzia sawiin, naupang leh nu nau paite an lo hrisel zawk nan vaccine lak kawngah line department leh tlawmngai pawl hrang hrangte nen thawk hova hma lak a ngaih thu a sawi a ni.

He hunah hian Lunglei District Immunisation Officer Dr Christina Zonunmawii chuan report pein, routine immunisation kal tlangin vaccine hmanga natna ven theih chi hrang hrangah naupang kum 5 hnuai lam leh nu nau pai zawng zawngin vaccine an lak theih vek nan hma lakna  kalpui mek a nih thu a sawi a. Lunglei District chhunga vaccine pek dan dinhmun te, hmabak leh hmachhawp la awmte sawi ho niin, ṭha leh hlawhtling zawka vaccine pek kalpui a nih theih dan tur rawtna hrang hrangte sawi ho a ni bawk.