1920/2025-2026

Lunglei, 2025 Thlazing ni 29: Vawiin khan Lunglei District Task Force on Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District-a kum 2025 April - June chhunga naupang leh raipuarte hnena natna hri leng inkai chhawn theih laka invenna (vaccine) pek dan dinhmun thlir hovin, ṭha leh hlawhtling zawka hri danna pek kalpui a nih theih nana rawtna hrang hrang an sawi ho.

He hunah hian DTFI Secretary, Lunglei District Immunisation Officer Dr Christina Zonunmawii chuan report a pe a. Kum 2025-2026 chhunga Lunglei District-a Sub-District Hospital (SDH), Primary Health Centre (PHC) leh Main Centre (MC) kal tlanga hri danna pek turin raipuar 2,108 tinzawn (target) niin, thla thum dan (quarterly) zelah raipuar 527 chu hri danna pek ngai anga chhut a ni a. Kumin April-June chhung khan sakawr-ek-hrik (tetanus) leh hrawk na (diphtheria) hri danna, Td vaccine la kim raipuar 510 an awm a. Hemi chhung hian in lama nau nei 78 awmin, damdawi ina nau nei 457 an awm thung.

Lunglei District-ah kum 2025-2026 chhunga SDH, PHC leh MC kal tlanga hri danna pek turin nausen 1,846 tinzawn niin, thla thum danah nausen 461.5 zelin hri danna an lak ngai tura chhut a ni a. Kumin April-June chhungin Penta-1 vaccine la nausen 457 leh MR-1 vaccine la nausen 386 awmin, nausen kum 1 hnuai lam hri danna la kim (fully immunised children) 393 an awm a. Hemi hun chhung hian Lungleia damdawi in pathum - Civil Hospital Lunglei, Christian Hospital Serkawn leh John Williams Hospital te chuan an damdawi ina nau piang 331 hnenah BCG leh OPV vaccine pein, nausen 298 chu Vitamin K an pe tih tar lan a ni bawk.

He hunah hian kumin October thlaa India rama district thlan bik ṭhenkhata zenghri danna (polio vaccine) pek runpui, Sub-National Immunisation Day (SNID) hman tur chungchang pawh sawi ho a ni a. Mizorama SNID hmanna tur district pali zingah Lunglei District pawh telin, October ni 14, 2025 (Thawhlehni)-ah SNID - hri danna pek runpui hun hi hman tur a ni a. Hemi huna zenghri danna pek tur hian Lunglei District chhunga naupang kum 5 hnuai lam, October ni 14, 2020 hnu lama piang naupang 11,001 tinzawn an ni.

March ni 27, 2014 khan World Health Organisation (WHO) chuan India chu zenghri awm tawh lohna ram (polio free)-ah a puang a. Hetih lai hian ram ṭhenawmah zenghri hmuh a la nih reng avangin zenghri danna pek hi kalpui chhunzawm zel a ni a. Nikum 2024-25 chhung khan Lunglei District aṭangin zenghri ni thei awma rinhlelh sample 6 chu phaiah endik tura thawn niin, kumin April - August chhungin sample 3 thawn a ni bawk a. Zenghri erawh hmuh a ni lo.