DIRECTORATE OF INFORMATION & PUBLIC RELATIONS, Government of Mizoram, India

4564/2024-2025

Lunglei, 2025 Vau thla ni 6: Vawiin khan Lunglei District Water & Sanitation Mission (DWSM) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. DWSM member inruat ṭhat chungchang leh plastic bawlhhlawh thehthang leh sawngbawl kawnga hma lak dan tur an sawi ho.

He hunah hian Lunglei DWSM Member Secretary, PHED Lunglei Rural WATSAN Division-a Sr Executive Engineer Er ZR Ṭhasangzuala chuan ṭhut khawm koh chhan a sawi fiah a. Sawrkar laipui Ministry of Jal Shakti, Department of Drinking Water and Sanitation aṭanga Swachh Bharat Mission (Grameen) Phase II leh Jal Jeevan Mission hnuaia tui leh invawn thianghlimna kawnga hma la tura din DWSM ruangam leh tih tur duan thar milin Lunglei DWSM member inruat ṭhat a ni a. Lunglei District chhungah Plastic Waste Management Unit (PWMU) din a nih a, plastic bawlhhlawh thehthang leh sawngbawl kawngah felfai leh awmze nei zawka hma lak a nih theih dan tur sawi ho niin, rawtna hrang hrang zul zuiin PHED Lunglei Rural WATSAN Division lamin kawng awm theih dan tur lo zir chiang se, tih a ni.

Attachment