Vawiin khan Lunglei DC Conference Hall-ah kumin MLA General Election  vil tura Election Commission of India in a ruat Lunglei District Observer-te leh political party hrang hrang  aiawhten inkawmhona hun an hmang.

Meeting ah hian General Observer pathum - Mr NS Prasanna Kumar, IAS (29 – South Tuipui, 30 – Lunglei North,32 – Lunglei West), Mr Armstrong Pamei, IAS, (31 – Lunglei East, 33 – Lunglei South) Mr Chakravarthi Mohan, IAS (34 – Thorang, 35 – West Tuipui) leh Police Observer Mr Sangakal Veeresh Prabhu, IPS (All Constituencies) te an tel a.  Inthlan felfai leh muanawm tak a awm theihna tura thil pawimawhte kalkhawmte an sawipui. Observer-te hian an bial chan theuha polling station hrang hrang endik tura Lunglei District an fan kual thu sawiin an kalna hmunah te inpuahchahna tha an tih thu an tarlang a. Inthlana sum senso te mumal taka chhinchhiah leh ziah te, Model Code of Conduct zawm that te, party flag, banner leh poster tar chungchangah te leh inthlan kaihhnawiha ECI in guidelines hrang hrang a siam te ngai pawimawh leh zawm theuh turin kalkhawmte an chah a. Mizoram chu India rama state ralmuang berte zinga mi a ni tih leh inthlan muanawm taka buatsaih thin a ni tih an hriatin lawmawm an tih thu an sawi bawk. Political party hrang hrangte chu mimal thil taka inbeihna leh dawta inchirhtheh te awm lova thianghlim taka campaign tura chahin, tum dang ang bawka inthlan felfai tak a awm theih nana thawh hopui turin a sawm nghal. Inthlan chungchanga sawisel duh leh report pe duh te tan biakpawh theih reng an nih thu an tarlang bawk.

Vawiin meeting-ah hian Lunglei District huamchhunga RO –te Dr Ankita Chakravarty (31-Lunglei East), Pu Benjamin Lalzama (29-South Tuipui, 30 – Lunglei North), Pu K Lalrohlua (32 – Lunglei West, 33 – Lunglei South), Pu Lalnundika (34 – Thorang, 35 – West Tuipui) leh ARO te bakah political party aiawh leh candidate agent-te an tel a ni.

A hnuaiah hian Mizoram Legislative Assembly inthlan vil tura Election Commission of India in a ruat Lunglei District Observer hrang hrangte leh an vil tur Assembly Constituency bakah an mahni biakpawhna tur contact number tarlan a ni a, anmahni biak mamawhna nei tan an biak theih reng ang.