DIRECTORATE OF INFORMATION & PUBLIC RELATIONS, Government of Mizoram, India

Vawiin khan Lunglei DC Pu R. Vanrengpuia kaihhruaiin Lunglei DC Conference Hall-ah Covid-19 vanga inkharkhip chhunga essential commodities lei leh pekchhuah dan ruahmanna siam turin meeting neih a ni. Meeting-ah hian Lunglei SP Pu C.Lalthanmawia leh a kaihhnawih sawrkar official-te bakah Sub Hqrs YMA Office Bearer-te leh VLTF aiawh Bazar Veng, Chanmari, Venglai leh Ramthar te an tel.

District Bawrhsap/Chairman, District Level Task Force On COVID-19 Pu R. Vanrengpuia chuan Lunglei District huam chhunga khua leh Veng hrang hrang Village Level Task Force leh volunteer te inpekna leh thawhrimna chu fakawm a tih thu sawiin an chungah lawmthu a sawi a. Sub Hqrs YMA leh Branch YMA tinte inpekna avangin an chungah lawmthu a sawi bawk. Kalkhawmte chu harsatna awm apiangah District Administration hriattir vat tura ngenin kawng engkima thawkhova ruahmanna siam puiah a sawm.

Meeting-ah hian inkharkhip chhunga mipuiin ei leh bar leh an nitin mamawh an tlakchham loh na tura ruahmanna kal mek chu thlirho a ni a. Tun dinhmunah Lunglei khawpuiah mipui mimir chhuakvak lovin VLTF-ten eibar lakkhawm an buaipui a, veng/khua engemawzatah Home Delivery kalpui mek a ni a. He ruahmanna hi kalpui chhunzawm zel ni se tih Committee chuan a rel a. Tin, Lunglei khaw pawn, thingtlang khaw lam te pawh an eibar mamawhte an VLTF ten Lungleiah an rawn lam sak thin a. Heng thingtlang atanga mamawh lam te veivah dan tur leh khawpui chhunga essential commodities dawr lian te an dawr theih dan tur chungchang ruahmanna siam a ni a. Hemi chungchangah hian VLTF leh VLTF te in dawr tawn se tih Committee chuan relin hemi kawnga harsatna neite chuan District Control Room-ah an thlen tur a ni a. Tin, District khuate chu Zone thum – North, South leh West Zone-ah then niin hengte hi Lungleia an rawn bazar theih ni bituk a ni ang.

Meeting-ah hian Lunglei District-a eibar leh nitin mamawh Stock position pawh sawiho niin hemi chungchanga hma la tur hian Lunglei DCSO hnuaiah Inspecting Squad an awm mek a. Heng Inspecting Squad-te hian nitin stock position bakah ni khata dawr atanga hralh chhuahte pawh record vekin Lunglei DCSO leh DC hnenah Daily Report thehlut se tih rel a ni.

A hnuaia tarlan ang hian Lunglei District Level Task Force on Covid-19 chuan District Control Room pahnih a ruat a. Heng number te hi engtik lai pawhin biak pawh theih an ni e.