153/2024-2025 

LUNGLEI; the 11th April, 2024: Vawiin chawhnu dar 1:00 khan DC Conference Hall-ah Lok Sabha inthlanpuia Mizoram state vil tura  General observer atana ruat Dr. Nipun Vinayak, IAS chuan Lok Sabha inthlanpui kaihhnawiha mawhphurtu hrang hrang chelhtu: Nodal Officer te, Police Official te leh Core Election Team member te meeting a neihpui.

Vawiin meeting-ah hian Pi Ramdinliani, District Election Officer leh bawrhsap ni bawk chuan Power Point Presentation hmangin Lunglei district in boruak muanawm tak hnuaia Lok Sabha inthlanpui felfai leh thianghlim tak kan neih theih nana kan inpuahchahna te  entirin,   chipchiar takin a sawifiah/hrilhfiah nghal zel a ni.

General Observer Dr. Nipun Vinayak, IAS  chuan, Lok Sabha Election,2024 tana Lunglei District inpuahchahna chu lungawi thlak a tih thu sawiin,Election zawh hma chuan tha thlah lova tang mar pat turin official te chu a  chah a. Lunglei district-ah Lok Sabha inthlanpui felfai leh thianghlim tak, boruak muanawm tak hnuaiah a awm ngei a beisei thu tarlangin, chumi atan chuan mawhphurhna hrang hrang kengkawhtu officials te chu duhsakna a hlan hlawm bawk a ni.

Lunglei District-ah hian Assembly segment 6 awmin, Polling station 176 a awm. Chung zinga 24 te chu hmeichhe hlangin an vil tur a ni a. Model Polling station 6 a awmin, Polling station 109 atangin web casting tih tum a ni.

Lunglei district hnuaiah voters 100700( male- 49904 & female-50796) awm mekin, PwD Voters-337, kum 85 chin chunglam-404, service voters-554 an awm bawk.Voters 500 aia tlemna polling station 79 a awm a, chung ho chu Polling official 3 chauh vin an vil dawn a ni. Polling station hla zual 13 awmin, a hla ber hi Marpara Polling Station (121Km)  a ni. Polling station hla zual 13 a duty tur Polling official te chuan Vote thlak ni hma ni hnih 2(P-2)(17th April)-ah polling station panin an chhuak hlawm dawn a ni.

 Assembly segment tin-ah hian Flying Squad team 2 zel, Static surveillance Team -2 zel, Video surveillance team-2 zel, Video Vewing Team-1 theuh,  Accounting Team 1  theuh leh Assistant expenditure observer pakhat(1)  theuh an awm a ni.

DC conference Hall-a Election Official te meeting an neihpui zawh hian, General Observer chuan  Saikuti Hall-a, EVM dahna  Strong Room leh Counting Hall tur te tlawhin  a endik a, EVM commissioning lai rei lo te a witness bawk a ni.