834/2025-2026

Lunglei, 2025 Nikir thla ni 11: Mizorama kum tina June ni 11-a hman ṭhin Green Mizoram Day chu vawiin khan Lungleiah "Ruahtui khawl nan thing i phun ang u" (Plant trees and catch the rain) tih thupui hmangin hman a ni a. He ni pual hian Lungleia sawrkar department, zirna in leh pawl hrang hrang 56 te chuan Lunglei tui lakna hnar, Pukpui ram chhung Tlawng leh Pialthleng panna kawngpui sirah inzar pharhin thing ṭiak 1,200 vel an phun a ni.

Chawhma dar 11:00-ah Pukpui Kawmzawla K. Liantawna Hall-ah Green Mizoram Day 2025 hawnna inkhawm buatsaih niin, Lunglei High Powered Committee (HPC) Vice Chairman Pu V. Malsawmtluanga chu khuallian a ni a. Khuallian chuan thing phun chu kan ti thei mai a, a enkawl zui lamah ṭan lak a ngai, a ti a. Kristian nihna chu nungcha leh thing leh mau humhalhna kawngah lan chhuahtir a pawimawh tiin, Pathianin a thil siam nungcha leh thing leh maute a ngaih pawimawh anga ngaih pawimawh leh humhalh hna thawh chu Pathian leh mahni mihringpuite tana rawngbawlna a ni, a ti a. Thing phun chu sik leh sa leh tui hna humhalhna leh ram nuam siamtu a nih thu sawiin, Lunglei khawpuiin tui harsatna a tawh ṭhin su kiang turin tui hna siamtu atan thing phun uar deuh deuh va, a enkawl zui kawngah pawh theih tawp chhuah zel turin mipui pung khawmte chu a chah a ni.

Lungleia Green Mizoram Day puala inkhawm buatsaihah hian District Level Committee on Green Mizoram (DLCGM) Chairman, District Bawrhsap Pi Navneet Mann chuan inlawmna thu sawiin, Green Mizoram Day puala kum tin thing phun chu thil ṭha leh zawngchhang tlak, India ram leh khawvel pum huap pawha ramngaw siam leh humhalh tura hma laknaa tha thawhna pawimawh tak a ni, a ti a. Thing phun chu ramngaw siamtu ni satliah ngawt lovin, lei hnuaia tui dah khawl leh tui hna tipungtu, kut hna thawktute thar chhuah tipungtu leh khualzin tam zawk hip thei tura ram cheina ṭha tak a ni tiin, thing phun ngai pawimawh zel turin kal khawmte chu a sawm a ni.

He hunah hian United Pentecostal Church (North East India) pastor Rev. H. Roṭhuama'n hunserh hmangin, DLCGM Member Secretary, Conservator of Forest (Southern Circle) Pu Lalduhthlana chuan report pein, thing phun leh kangmei ven pawimawhzia a sawi a. Kumin ṭhal laia kangmei veng ṭha khua/veng lawmman, Village Level Fire Prevention Award 2025 sem niin, pakhatna Lungsen-I, pahnihna Mualcheng South leh pathumna Mualṭhuam North te hnenah lawmman pawisa fai leh thuziak chu Khuallian chuan a hlan a. MJA Lunglei District President Pu H. Lalthansanga chuan lawm thu sawiin hun a khar a ni.

Hawnna hun hman zawh hian Khuallian Pu V. Malsawmtluanga, Bawrhsap Pi Navneet Mann leh Lunglei Municipal Council (LMC) Chairman Pu Lalzuithanga te'n K. Liantawna Hall kawtah Mizoram state thing, herhse ṭiak pakhat ṭheuh an phun a. DLCGM member-te leh office hrang hrang hotute chuan Higher and Technical Institute Mizoram (HATIM) campus chhungah thing an phun bawk a. Hemi hnu hian Lunglei tui lakna Pialthleng leh Tlawng panna kawng dunga Environment, Forests & Climate Change (EF&CC) Department lamin department leh pawl hrang hrangte thing phunna tur hmun an ruahman saah thing phun tur leh a hungna tur an lo chhawp lawk angin department leh pawl hrang hrangte chuan thing hi phunin, he'ng an thing phunte hi ṭha takin an hung nghal vek a ni.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan niin, kum 1999 aṭangin "Green Mizoram" tih hming chawiin ram pumah thing phun ni atan hman a ni a. Nikum khan National Highway 54 kawng dungah Lungleia department leh pawl hrang hrang 54 te'n thing ṭiak 1,166 an phun a, EF&CC Department chhinchhiah danin 66% vel a la nung a. Kumin Green Mizoram Day-a thing phunte hi a phuntu department ṭheuhte'n enkawl zui tura beisei niin, DLCGM chuan enkawl zui a nih dan hi vil zui an tum a ni.