4058/2025-2026

Lunglei, 2026 Pawlkut thla ni 20: Kar hmasa Zirtawpni khan Healthy Lunglei District Campaign hnuaia hma lakna pakhat, Healthy Lunglei App siam mek chungchangah hriselna lama thawktute tan Lunglei DC Conference Hall-ah App thar hman dan tur zir hona (orientation training) buatsaih a ni.

Additional Deputy Commissioner Pi Rochuangkimi Khenglawt chuan hawnna thu sawiin, Healthy Lunglei App thar hman tur chu District chhunga hriselna kawnga hmasawnna hmanrua atan ṭangkai taka hman a nih theih nan a hmangtu turte'n uluk taka training neih hmasak a pawimawh thu a sawi a. Training-a telte chu an thil zirte uluk taka zir a, a taka an hman chhuah hunah ṭangkai taka hman tum turin a chah.

He hunah hian Lunglei District chhung hmun hrang hrang aṭangin Doctor, Health & Wellness Officer, Pharmacist leh Data Entry Operator, an zavaiin mi 80 vel an kal khawm a. Healthy Lunglei App siamtu LushAITech aṭangin CFO & CSO Pu Lalremruatkima, Director Pu Malsawmtluanga Chhangte leh Software Developer Pu Thuamthangpuia te'n Healthy Lunglei App chungchang leh a hman dan tur an zirtir a. Zawhna leh chhanna leh sawi hona hun hman a ni bawk.

Healthy Lunglei App hi Healthy Lunglei District Campaign hnuaia District mipuite'n hriselna kawnga hma an sawn theihna tur leh awlsam zawka hriselna kaihhnawih mamawh inpek theihna atana ruahman a ni a. Mipui hman theih tura tlangzarh thuai tum a ni.