3632/2024-2025

2024 Pawltlak thla ni 3: Healthy Lunglei District Campaign kalpui mek hnuaia Mizoram Ṭhalai Kristian Pawl (MṬKP) nen ṭang kawpa hriselna chungchang beihpui thlak tur (pilot project) chu vawiin khan Lunglei DC Conference Hall-ah District Bawrhsap Pi Navneet Mann chuan a hawng.

Bawrhsap Pi Navneet Mann chuan Healthy Lunglei District Campaign hnuaiah hriselna dinhmun endikna leh hriselna atana nunphung ṭha inzirtirna kalpui mek a nih thu sawiin, District mipuite an lo hrisel zawk theih nana hma lakna chu kalpui chhunzawm zel tum a nih thu a sawi a. Natna inkai chhawn theih chi (communicable disease) laka inven fimkhur a pawimawh ang bawkin natna inkai chhawn theih loh chi (non-communicable disease) vei lo turin ei leh in leh nunphung uluk a pawimawh tih sawiin, hriselna dinhmun endik leh natna hmuh chhuah hma chu inenkawlna ṭha nei tura ṭul hmasa a ni tih a sawi a. Hriselna atana ei leh in leh nunphung ṭha inzirtirna kawnga ṬKP-te nena hma lak ho a ni tur chu lawmawm a tih thu sawiin, rah ṭha a chhuah a, ṭhalaite leh mipuite'n nunphung hrisel zawk an neih phah ngei a beisei thu a sawi.

He hun hi Election Officer Pi R. Lalrinzuali chuan a kaihruai a. Additional Deputy Commissioner Pu James Miahlung chuan inlawmna thu sawiin, Healthy Lunglei District Campaign hnuaia hma lakna tlangpui a tar lang a. Healthy Lunglei District Campaign chu June ni 12, 2024 aṭanga kalpui ṭan a nih thu leh hmun hrang hrangah hriselna dinhmun endik leh inzirtirna kalpui tawh a nih thu a sawi a. November ni 21, 2024 thlengin mi 3,251 hriselna dinhmun endik a nih tawh thu te, thisensang hriat chhuah thar 162 leh zunthlum hmuh thar 75 an awm thu leh thisensang hriat tawh sa 199 leh zunthlum case hlui 106 endik nawn an nih thu a sawi bawk.

MṬKP Secretary Rev. F. Zorinkhuma pawhin thu sawiin, MṬKP-in ṭhalaite hriselna atana hma a lak mek dan a tar lang a. Kumin June ni 19 khan ram pumah 'Hriselna atan Tlan' an huaihawt thu leh MṬKP hnuaia bial leh unit hrang hrangah hriselna lam hawia hma an lak chhoh mek thu sawiin, tuna hriselna lam hawia sawrkar leh kohhran thawh hona tur chu phurawm a tih thu a sawi a. Sawrkar thuneitute chungah leh hemi atana hma la tur bial leh unit hrang hrangte inpeknaah lawm thu a sawi nghal bawk.

Healthy Lunglei District Campaign hnuaia District thuneitute leh MṬKP ṭang kawpa hma lakna tur atan hian pastor bial ṬKP pathum - Bazarveng, Rahsiveng leh Theiriat bial leh an hnuaia unit 14 te thlan an ni a. Zingkara kea kal, thla kipa infiamna hun huaihawt, kohhran/ṬKP chanchinbu leh social media kal tlanga hriselna lam hawi inzirtirna puanzar, member-te hriselna dinhmun endik, inzirtirna thuziak sem darh, intlansiak, thu inziahsiak leh hma lakna remchang ang ang kalpui turin ruahman a ni.