No.323/2021-2022

Lunglei the 29^th April, 2021 –Health & Family Welfare Minister Dr R. Lalthangliana hovin vawiin chawhnu khan Lunglei DC Conference Hall-ah Covid-19 chungchangah meeting neih a ni. Meeting-ah hian Lunglei HPC Vice Chairman Pu Lawmawma Tochhawng, Lunglei DC Pu Kulothungan  A, SP Pu Rex Zarzoliana Vanchhawng, CMO Dr LC Liana leh DLTF member dangte an tel a ni.

Meeting-ah hian Covid-19 hrileng darh zel lohna tura Lunglei District-a hmalakna kal mekte leh Covid-19 do kawnga DLTF leh medical lam mamawhte sawiho a ni.  

Health Minister chuan Covid-19 hrileng thawh hnihna chu India ramah nasa taka leng mekin Mizoramah pawh Covid-19 positive hmuhchhuah nitin in an pung mek zel a. Covid-19 hrilengin zual lam a pan zel avangin mipuite kan fimkhur lehzual a tul takzet a ni tiin mitinten kan awmhmuna kan tih ve theih COVID appropriate behaviour - Mask vuah that, kut silfai uluk leh social distancing bakah sawrkarin inkaihhruaina a siam Standard Operating Procedure (SOP) te a hma aia uluk lehzuala kan zawm thar leh a tul a ni, a ti bawk. Covid-19 hrileng do kawnga a tir atanga a hmatawnga awm, hun leh tha leh ngaihtuahna nasa taka seng thin tu VLTF-te Lunglei District Veng/khaw hrang hrangah an che chhuak leh mek chu lawmawm a tih thu sawiin VLTF-te mamawh leh ruahmanna siampui ngai te kawng engkima lo ngaihven pui thin turin DLTF hruaitute chu a chah a. Tun dinhmunah Lunglei District-ah Active Case tam lo mah se, kan fimkhur loh chuan hun reilote karah a pung thut thei anih ti hre reng chungin Lunglei District mipuite chu a hma aia fimkhur zual sauh turin H&FW Minister chuan a chah a ni.

Lunglei Civil Hospital-ah Truenat Quattro (vawi khata sample pali test rual theih) pakhat chauh a awm avangin leh a thawktu technician indaihlohna avangin duh angin sample test a kal chak theihloh thu Health Minister hnenah hian thlen a ni a. Hemi chungchang hi Health Department-in an ngaihtuah sak nghal vat tur thu Health Minister chuan a sawi a ni. Christian Hospital Serkawn-in Rapid Antigen Test na hmun Testing Centre tur chu H&FW Lunglei District hotuten an enfiah vek tawh thu pawh report niin hei hi sawrkarah phalna nghah mek niin approval hmuh thuai a beiseiawm thu tarlan a ni a. Medical Superintendent Dr SR Ngurchamliana chuan Lunglei District Oxygen dinhmun a that thu leh Civil Hospital-a Oxygen plant pawh afunctional thu a report a ni.

Covid-19 Hri danna pek chhuah chu Nationwide Vaccination Drive 16th January, 2021-a bultan ruala Mizoramah pawh pek chhuah tan niin 28^th April 2021 thleng khan Mizoram pumah vaccine dose 2,40,452 pek chhuah tawh niin First Dose la tawha second dose la hmabak mi 1,95,201 leh 1^st dose leh 2^nd dose la kim tawh mi 45,251 an awm a. Lunglei H&FW Department chuan Lunglei District leh Hnahthial District-ah dose 35,512  an pe chhuak tawh a ni.