1632/2025-2026

Lunglei, 2025 Mimkut thla ni 27: 2 Mizo Battalion National Cadet Corps (NCC)-in 2nd Battalion Mizoram Armed Police (MAP) Complex, Luangmual, Lungleia ni 10 awh Combined Annual Training Camp (CATC-94) an buatsaih chu nimin khan hlawhtling taka zawh fel a ni.

CATC-94 hi September ni 18, 2025 khan ṭan niin, Mizoram chhim lama sikul leh college hrang hranga NCC Junior Division (JD), Junior Wing (JW), Senior Division (SD) leh Senior Wing (SW) aṭangin cadet 200 chuangin camp hi an chhim a. Ni 10 chhung hian cadet-te chuan sipai lâm (drill), silai leh ralthuam chelek, ram lem (map) en dan, ramhnuaia chettlat dan, infiam leh taksa sawi zawi, hruaitu ṭha ni tura thil pawimawh leh khua leh tuite mawhphurhna hrang hrang an zir a. Mi thiam sawm bikte nen thupui hrang hrang - sipai nihphung, ei zawnna, chhiatna laka inven dan, lirthei khalh kawnga himna, dan hriatna, media hman dan leh nunphung dik chungchang te zir ho leh sawi hova hun hman ṭhin a ni bawk.

Camp chhung hian cadet-te hmaah drone hman dan entirna (live drone display) buatsaih a ni a. Vibrant Village Programme hnuaiah cadet-te leh NCC officer-te chuan Lunglawn khawtlang mipuite nen hun hmang hovin, "Swachhata Hi Seva" faina hnatlang leh volleyball hmanga intihhlimna bakah, vantlang nun ho dan, vantlang rawngbawlna leh ram inpumkhatna pawimawhzia zir hona te buatsaih a ni.

CATC-94-ah hian 2 Mizo Battalion NCC hnuaia a hmasa ber atan, hmeichhe hlang awmna 'Girls Guard' siam niin, 'Girls Guard' te hian thiam takin silai kenga zahna chibai inbuk dan an entir bawk.

Camp kharnaah Camp Commandant Colonel Sagar K. Mohanty chuan cadet-te chu an thu awihna, thathona leh hlawhtlinnaah lawmpuina a hlan a. Camp chhunga inelna leh thil tihna hrang hranga ti ṭhate lawmman sem a ni a. Cultural programme hlimawm tak nen camp hmawr hi bawk niin, cadet-te'n hnam lam, hnam zai leh an thiam thil chi hrang hrang an entir a ni.

Attachment

  • Loading attachment...